ՏԵՍԱՆՅՈՒԹ. Էդմոն Մարուքյանն անդրադարձել է Պուտինի և Փաշինյանի հանդիպմանը

Հատուկ հանձնարարություններով նախկին դեսպան, ԱԺ նախկին պատգամավոր Էդմոն Մարուքյանն անդրադարձել է մայիսի 8-ին Մոսկվայում ՌԴ նախագահ Վլադիմիր Պուտինի և Նիկոլ Փաշինյանի հանդիպմանը։

Մասնավորապես, նա ուշադրություն է հրավիրել Հայաստանից տարածված հաղորդագրության վրա, ըստ որի՝ «հանդիպմանը համաձայնություն է ձեռք բերվել 44-օրյա պատերազմի ընթացքում, դրանից հետո Սյունիքի, Տավուշի, Վայոց Ձորի, Գեղարքունիքի, Արարատի մարզերում տեղակայված ռուս սահմանապահ և զինվորական կետերը դադարեցնեն իրենց տեղակայումը, դուրս կգան այդ տեղերից։ Հաստատվել է նաև «Զվարթնոց» օդանավակայանում ռուս սահմանապահների գործունեության դադարեցման որոշումը»։

«Սա Հայաստանում ներկայացվում է որպես հաղթանակ, մեծ ձեռքբերում։

ՌԴ նախագահի մամուլի խոսնակը նույն հանդիպման մասին հայտարարում է, ըստ որի՝ համաձայնեցվել է Հայաստանի մի շարք շրջաններից ռուս սահմանապահների դուրս բերումը, ասվում է՝ հայկական կողմի խնդրանքով ռուս սահմանապահները կշարունակեն մնալ հայ-թուրքական և հայ-իրանական սահմանին։

«Այսինքն ՀՀ վարչապետը խնդրել է Պուտինին, որ Հայաստան-Իրան, Հայաստան-Թուրքիա սահմանի վրա ՌԴ սահմանապահ զորքերը իրականացնեն իրենց ծառայությունը։ Նախ Հայաստանն այդպիսի օրակարգ չի ունեցել, որ Հայաստան-Թուրքիա կամ Հայաստան-Իրան սահմանից ռուսական սահմանապահներին պետք է հանենք: Նման պահանջ ՀՀ-ն չի ներկայացրել: Դա եղել է փորձագիտական դաշտի պահանջ: Հիմա հարց է առաջացել. Ի՞նչ է եղել Կրեմլում, որ ՀՀ վարչապետը խնդրել է Պուտինին, որ Հայաստան-Իրան սահմանի վրա շարունակեն ՌԴ սահմանապահ զորքերը ծառայել:

Մեկ ուրիշ հարց էլ է առաջանում. Օրինակ Ջեք Սալիվանը, Ուրսուլա ֆոն դեր Լայենը, Մակրոնը, ԵՄ առաջադեմ պաշտոնյաները հիմա ի՞նչ կմտածեն Հայաստանի մասին: Հայաստանը ԵՄ դիտորդներին ասում է՝ եկեք Հայաստան-Ադրբեջան սահմանին կանգնեք, մոնիտորինգ արեք, ՌԴ-ին խնդրում է, որ Հայաստան-Իրան եւ Հայաստան-Թուրքիա սահմանին մնան, հետո Ռուսաստանին ասում է՝ դուրս եկեք «Զվարթնոցից» եւ պատերազմից հետո այդ մի քանի փոքր կետերից: Սա ի՞նչ շիլափլավ է: Հայաստանի ԱԺ նախագահը գնում, ասում է՝ Ուկրաինայի նկատմամբ ՌԴ-ն ներխուժում է իրականացրել, այսինքն ասում է՝ ՌԴ-ն օկուպանտ է, դրանով մտնում է ռուս-ուկրաինական թեմայի մեջ, մյուս կողմից վարչապետը այդ նույն երկրին խնդրում է, որ շարունակի մնալ Թուրքիայի ու Իրանի հետ մեր սահմանին:

Այսինքն երկրի ներսում ժողովրդին ասում են՝ գնում ենք Եվրամիություն, գնում ենք Մոսկվայում այլ բան ենք խնդրում։ Ինձ ավելի շատ հետաքրքրում է Հայաստան-Իրան սահմանի հարցը»,- ընդգծել է Մարուքյանը:

«Ինչո՞ւ ենք մենք այսքան անհասկանալի. Ինչու կարելի է երկրի ներսում տալ մեսիջներ, որ երրորդ երկիրը փորձում է իշխանությունը տապալել, քանդել, կործանել մեզ, ծայրագավառ մեզ դարձնել, հետո գնում ենք այդ երկրին խնդրում ենք, որ իրենց զորքերը մնան իրենց տեղում: Ես սպասում եմ պարզաբանումների ՀՀ իշխանություններից, նաեւ փորձգիտական դաշտից»,- ընդգծեց նա:

Մանրամասն՝ տեսանյութում։