Հնդկաստանը Իրանի հետ պայմանագիր է ստորագրել

Հնդկաստանը Իրանի հետ պայմանագիր է ստորագրել իրանական Չաբահար նավահանգիստը 10 տարով գործարկելու շուրջ: Այս մասին հայտնել է Հնդկաստանի վարչապետ Նարենդրա Մոդիի կառավարությունը, հայտնում է Reuters--ը։ 

Նշվում է, որ համաձայնագիրը նախատեսված է 10 տարվա համար: Պայմանագրի ստորագրումը տեղի է ունեցել Թեհրանում, ուր ժամանել էր Հնդկաստանի նավագնացության նախարար Սարբանանդա Սոնովալը։ Երկարաժամկետ պայմանագիրը ստորագրվել է Indian Ports Global Limited (IPGL) և Իրանի Port & Maritime Organisation ընկերությունների միջև։

Հնդկաստանը Իրանի հարավ-արևելյան ափին գտնվող Չաբահար նավահանգիստը զարգացնում էր՝ որպես Իրան, Աֆղանստան և Կենտրոնական Ասիայի երկրներ ապրանքներ տեղափոխելու ուղի՝ շրջանցելով Պակիստանում գտնվող Կարաչիի և Գվադարի նավահանգիստները։

Այնուամենայնիվ, ըստ հրապարակման, Թեհրանի նկատմամբ Վաշինգտոնի պատժամիջոցները դանդաղեցրել էին նավահանգստի զարգացումը։

Իրանի ճանապարհների և քաղաքային զարգացման նախարար Մեհրդադ Բազրփաշը հայտնել է, որ IPGL-ը մոտ 120 միլիոն դոլար կներդնի, նաև կլինի 250 միլիոն դոլարի լրացուցիչ ֆինանսավորում՝ պայմանագրի արժեքը հասցնելով 370 միլիոն դոլարի։

Չաբահարը իրանական միակ նավահանգիստն է, որն ուղիղ ելք ունի դեպի Հնդկական օվկիանոս։ Հնդկաստանը նաև ձգտում է իրանական Չաբահար նավահանգիստը վերածել տարանցման հանգույցի՝ «Հյուսիս-Հարավ» միջազգային տրանսպորտային միջանցքի շրջանակներում ԱՊՀ շուկա մուտք գործելու համար։