Շոյգուն ազատվել է ՌԴ ՊՆ ղեկավարի պաշտոնից՝ ստանալով նոր պաշտոն

ՌԴ նախագահ Վլադիմիր Պուտինը հրամանագիր է ստորագրել Սերգեյ Շոյգուին Նիկոլայ Պատրուշևի փոխարեն Անվտանգության խորհրդի քարտուղար նշանակելու մասին, հայտնում է ՏԱՍՍ-ը՝ վկայակոչելով Կրեմլի հաղորդագրությունը։ Մեկ այլ հրամանագրով Պատրուշևը հեռացվել է զբաղեցրած պաշտոնից։

ՌԴ նախագահի մամուլի քարտուղար Դմիտրի Պեսկովի խոսքով՝ Շոյգուն՝ որպես Անվտանգության խորհրդի քարտուղար, կլինի Ռազմարդյունաբերական համալիրի հանձնաժողովի նախագահի տեղակալը։

Կրեմլի ներկայացուցիչը հայտնել է, որ ՌԴ ՊՆ գլխավոր շտաբի պետ Վալերի Գերասիմովը կշարունակի աշխատել իր պաշտոնում։ Թե ինչ պաշտոնի կնաշանակվի Պատրուշևը, հայտնի կդառնա մի քանի օրից, հավելել է Պեսկովը։ Նրա խոսքով՝ Անվտանգության խորհրդի քարտուղարի պաշտոնանկությունը պայմանավորված է այլ աշխատանքի անցնելու պատճառով։

Ավելի վաղ հայտնի էր դարձել, որ կառավարության կազմի փոփոխության շրջանակներում Պուտինի կողմից Դաշնային խորհրդի քննարկմանը ներկայացված թեկնածուների ցուցակում առաջարկվել է պաշտպանության նախարարի պաշտոնակատար նշանակել առաջին փոխվարչապետ Անդրեյ Բելոուսովին: Նախորդ կազմում նա վերահսկում էր սոցիալ-տնտեսական բլոկը։