ԵՄ-ն համաձայնեցրել Է Ուկրաինայի համար անվտանգության երաշխիքների նախագիծը
Եվրամիությունը համաձայնեցրել է Ուկրաինային անվտանգության երաշխիքներ տրամադրելու նախագիծը, ներկայումս Բրյուսելն այն քննարկում է Կիևի հետ: Այս մասին հայտնում է Welt am Sonntag թերթը՝ վկայակոչելով իր տրամադրության տակ հայտնված փաստաթուղթը։ Նրա տեղեկություններով՝ ԵՄ 27 երկրների դեսպանները վերջերս համաձայնեցրել են 11 էջանոց տեքստը, որը նշված է որպես «գաղտնի»: Բրյուսելը մտադիր է երաշխիքներ տրամադրել ոչ ուշ, քան հուլիսի սկզբին։ Դրանց գործողությունը կտարածվի մինչեւ ԵՄ-ին եւ ՆԱՏՕ-ին Կիեւի անդամակցության պահը։
«Եվրոպական միությունը եւ նրա անդամ պետությունները վճռորոշ ներդրում են կատարում Ուկրաինայի անհապաղ եւ երկարաժամկետ անվտանգության եւ կայունության ապահովման գործում՝ ռազմական եւ քաղաքացիական օգնության, հումանիտար, ֆինանսական, առեւտրային եւ տնտեսական աջակցության, տեղահանված անձանց տեղավորման, բարեփոխումների աջակցության, վերակառուցման եւ վերականգնման, ինչպես նաեւ սահմանափակող միջոցների եւ դիվանագիտական աջակցության միջոցով»,-թերթը մեջբերում է փաստաթղթի քաղվածքը:
Դրանում նշվում է, որ «ագրեսիայի դեպքում Եվրամիությունն ու Ուկրաինան մտադիր են 24 ժամվա ընթացքում խորհրդակցություններ անցկացնել Ուկրաինայի կարիքների վերաբերյալ»: Ինչպես ընդգծում է թերթը, այդպիսով Բրյուսելը բացառել է Եվրոպական ուժերի միջամտությունն Ուկրաինայի հակամարտությանը, սակայն խոստացել է շարունակել սպառազինությունների մատակարարումն ու զինծառայողների ուսուցումը, օգնություն ցուցաբերել երկրի անվտանգության ոլորտի բարեփոխմանն ու ականազերծմանը, ինչպես նաեւ համագործակցել հիբրիդային սպառնալիքներին եւ կիբերհարձակումներին հակազդելու հարցում:
