Իսրայելը բացել է օդային տարածքն Իրանի հարձակումից հետո
Իսրայելի օդային տարածքը բացվել է Իրանի հարձակման ժամանակ մոտ 7 ժամ փակվելուց հետո։ Այս մասին հայտնում են Ynet-ը և Haaretz-ը:
Օդային տարածքի փակումից յոթ ժամ անց Թել Ավիվում օդանավակայանի ղեկավարությունը հայտարարել է, որ ժամը 7:30-ին (Երևանի ժամանակով 08։30) այն վերաբացվել է, գրում է Ynet-ը: Թել Ավիվից չվերթների չվացուցակի փոփոխություն է սպասվում, քանի որ ավելի վաղ իսրայելական և արտասահմանյան ավիաընկերությունները չեղարկել էին դրանցից շատերը: «Ռամենի» օդանավակայանը դեռ փակ է։
Մերձավորարևելյան մի շարք երկրներ ապրիլի 14-ի գիշերը հայտարարել են իրենց օդային տարածքը փակ քաղաքացիական ավիացիայի թռիչքների համար: Դրանց թվում են Իրաքը, Հորդանանը, Լիբանանը։ «Ռոսավիացիան» դադարեցրել է ռուսական ընկերությունների թռիչքները Իրաքի, Հորդանանի և Իսրայելի օդային տարածքում, ասվում է գերատեսչության հաղորդագրության մեջ՝ «մինչև սահմանափակումների վերացումը»:
Ապրիլի 14-ի գիշերը Իրանը թևավոր հրթիռներով և կամիկաձե անօդաչու թռչող սարքերով մի շարք հարվածներ է հասցրել Իսրայելի տարածքին: Դա տեղի է ունեցել ի պատասխան ապրիլի 1-ին Սիրիայի մայրաքաղաք Դամասկոսում իրանական հյուպատոսարանի ուղղությամբ իսրայելական օդուժի հարվածի:
NYT-ի տվյալներով՝ մեկ գիշերվա ընթացքում Իրանն Իսրայելի ուղղությամբ արձակել է ավելի քան 300 անօդաչու և հրթիռ։ Իսրայելական բանակը հայտարարել է, որ երկրի ՀՕՊ-ը «որսացել է հրթիռների ճնշող մեծամասնությունը», հարձակումը հետ մղելու գործում ներգրավվել են ռազմաօդային ուժերի «տասնյակ ինքնաթիռներ»: Հարձակման հետևանքով զոհերի մասին դեռևս չի հաղորդվում: CNN-ի փոխանցմամբ՝ վկայակոչելով ամերիկացի պաշտոնյաներին, Իսրայելի վրա Իրանի հարձակումը տևել է մոտ 5 ժամ:
