Վենեսուելան Ռուսաստանից օգնություն է խնդրել

Վենեսուելան Ռուսաստանից օգնություն է խնդրել ինքնաթիռների և հրթիռների հնարավոր տրամադրման հարցում։ Ամերիկյան լրատվամիջոցները պնդում են, որ ԱՄՆ-ն պատրաստ է հարվածներ հասցնել։

Նշվում է, որ մասնավորապես հոկտեմբերին Վենեսուելայի նախագահ Նիկոլաս Մադուրոն նամակ է ուղարկել Ռուսաստանի նախագահ Վլադիմիր Պուտինին՝ խնդրելով ամրապնդել Վենեսուելայի օդային պաշտպանությունը, այդ թվում՝ վերականգնել մի քանի ռուսական Սու-30 կործանիչներ։ 

Այս մասին հայտնել է The Washington Post-ը՝ հղում անելով ԱՄՆ կառավարության ներքին փաստաթղթերին։

Այս փաստաթղթերի համաձայն՝ Մադուրոն նամակում ընդգծել է, որ ռուսական Սու-30 ինքնաթիռները, որոնք Վենեսուելան նախկինում գնել էր, Վենեսուելայի ազգային կառավարության ունեցած ամենակարևոր զսպող գործոնն են։

Նույն նամակում Մադուրոն Պուտինից խնդրել է Ռուսաստանի օգնությունը հինգ ռադարային կայանների լիարժեք արդիականացման, 14 հրթիռային համակարգերի վաճառքի և որոշակի «լոգիստիկ աջակցության» տրամադրման հարցում։ Ավելին, Վենեսուելայի առաջնորդը Մոսկվայից խնդրել է պաշտպանական արդյունաբերության համար պատասխանատու պետական կորպորացիային՝ «Ռոստեխ»-ին, ֆինանսավորում տրամադրել երեք տարվա համար. փաստաթղթերում գումարը նշված չէ։

Կրեմլը հրաժարվել է մեկնաբանել նամակը։

ԱՄՆ կառավարության փաստաթղթերում նաև նշվում է, որ Նիկոլաս Մադուրոն ռազմական օգնություն է խնդրել Չինաստանից և Իրանից:

Իրենց հերթին, ամերիկյան լրատվամիջոցները հաղորդում են, որ ԱՄՆ-ն պատրաստվում է հարվածներ հասցնել Վենեսուելային։ Վաշինգտոնը մեծացրել է իր ռազմական ուժերը Կարիբյան ավազանում։