Վրաստանը դադարեցնում է մասնակցությունը Եվրոնեսթի աշխատանքներին

Թբիլիսին որոշել է չմասնակցել Եվրոնեսթի հաջորդ նիստերին՝ քննադատելով Եվրոպախորհրդարանի մոտեցումները։

Վրաստանի խորհրդարանի խոսնակ Շալվա Պապուաշվիլին հայտարարել է, որ Եվրոպախորհրդարանը վերջին շրջանում այս հարթակը վերածել է քաղաքական ճնշման գործիքի՝ հարևան պետություններին պարտադրելով իր օրակարգը։

Պապուաշվիլին ընդգծել է, որ Թբիլիսին չի տեսնում արդյունավետ համագործակցության հնարավորություն ներկայիս պայմաններում, քանի որ որոշ եվրոպական ուժեր դրսևորում են թշնամական և միակողմանի քաղաքական մոտեցումներ։ Նա հավելել է, որ Վրաստանը կարող է վերադառնալ Եվրոնեսթի գործունեությանը միայն այն դեպքում, երբ Եվրոպական խորհրդարանը կապահովի հավասար ու կառուցողական երկխոսության մթնոլորտ։

Հիշեցնենք, որ ավելի վաղ Եվրոնեսթը ընդունել էր բանաձև, որտեղ նշվում էր Վրաստանում ժողովրդավարության նահանջի, խորհրդարանական ընտրությունների կեղծման և հակաժողովրդավարական օրենքների ընդունման» մասին։ Թբիլիսին այդ գնահատականները համարում է անհիմն և քաղաքականապես շահադիտական։