ՏԵՍԱՆՅՈՒԹ․ Գազայում մարդիկ խեղդվել են՝ փորձելով հանել ջրում հայտնված մարդասիրական օգնության արկղերը․ մանրամասներ

Գազայի հատվածի իշխանությունները հայտնել են անկլավի տարբեր շրջաններում մարդասիրական օգնության օդային առաքման ժամանակ սխալների հետևանքով 18 մարդու մահվան մասին։

«Վերջին ժամերին 18 պաղեստինցի խաղաղ բնակիչ է մահացել մարդասիրական օգնության ոչ պատշաճ նետման հետևանքով», – նշվում է հաղորդագրության մեջ:

Հայտարարության համաձայն՝ անկլավի 12 սովահար բնակիչ խեղդվել է ծովում՝ փորձելով հանել ջրում հայտնված մարդասիրական օգնության արկղերը։ Նշվում է, որ ևս վեցը մահացել է հրմշտոցների հետևանքով՝ փորձելով հասնել ինքնաթիռներից նետված արկղերին։

«Մենք ամերիկյան վարչակազմին և իսրայելական օկուպացիային պատասխանատու ենք համարում սովի և պաշարման քաղաքականության համար», – ասվում է հայտարարության մեջ։

Անկլավի իշխանությունները ևս մեկ անգամ քննադատել են ինքնաթիռներից մարդասիրական օգնությունը բաց թողնելու պրակտիկան՝ կոչ անելով բացել սահմանային անցումները դրա առաքման համար։