Շվեդիան պաշտոնապես միացավ ՆԱՏՕ-ին

Շվեդիան պաշտոնապես միացել է ՆԱՏՕ-ին: Համապատասխան արձանագրությունը հրապարակվել է ԱՄՆ Պետդեպարտամենտի կայքում։

«2024 թվականի մարտի 7-ին կատարվել են Հյուսիսատլանտյան պայմանագրին Շվեդիայի Թագավորության միանալու մասին արձանագրության երկրորդ հոդվածով սահմանված պայմանները։ Ըստ այդմ՝ արձանագրությունն ուժի մեջ է մտել 2024 թվականի մարտի 7-ից»,- ասվում է փաստաթղթում։

Շվեդիան դարձավ ՆԱՏՕ-ի անդամ 32-րդ երկիրը։ Ինչպես հաղորդում է TV4-ը, մարտի 11-ին Բրյուսելում գտնվող ՆԱՏՕ-ի կենտրոնակայանում կբարձրացվի Շվեդիայի դրոշը։

Հյուսիսատլանտյան դաշինքի պայմանագրի համաձայն՝ պետությունը պաշտոնապես դառնում է ՆԱՏՕ-ի անդամ այն ​​բանից հետո, երբ ԱՄՆ կառավարությունը վավերացման փաստաթղթեր է ստանում դաշինքի բոլոր անդամներից: