ՌԴ-ի մաքսատունը սկսել է զանգվածաբար ստուգել ապրանքների ծագման երկրները

ՌԴ մաքսային ծառայությունը սկսել է ապրանքների ծագման երկրի, այդ թվում՝ շինարարական տեխնիկայի, սարքավորումների եւ աշխատանքային գործիքների լայնածավալ ստուգումներ։ Այս մասին հայտնում է Ведомости-ն՝ վկայակոչելով իր աղբյուրները: Տեղեկությունը փոխանցում է The Insider-ը։

Եթե ապրանքն արտադրված է ԱՄՆ-ում կամ դրա ծագումը հաստատված չէ, ապա մաքսատուրքի չափը կարող է կազմել 25-40%։ Միասնական մաքսային սակագնի դրույքաչափերը սովորաբար տատանվում են 3-ից 5% -ի սահմաններում:

Դրանց չափերը կարգավորվում են Ռուսաստանի կառավարության թիվ 788 որոշման համաձայն «ԱՄՆ-ում արտադրված անհատական ապրանքների համար ներմուծման մաքսատուրքերի դրույքաչափերը հաստատելու մասին»: Այն ընդունվել է 2018 թվականին՝ ի պատասխան ԱՄՆ-ի կողմից ռուսական պողպատի (25%) և ալյումինի (10%) ներմուծման մաքսատուրքերի սահմանման։

Պարբերականի տվյալներով՝ զանգվածային մաքսային ստուգումները սկսվել են 2024 թվականի փետրվարից։ B1 ընկերության գործընկեր Վիլհելմինա Շավշինան այս միտումը կապում է Եվրասիական տնտեսական հանձնաժողովի Խորհրդի 2024 թվականի հունվարի 26-ի որոշման հետ, որն ուժի մեջ է մտել փետրվարի 8-ին: Նա ընդգծում Է փաստաթղթում «պատասխան միջոցներ» հասկացության ներդրման կարևորությունը, որում ներառված են թիվ 788 որոշման ապրանքները:

Շավշինան նշում է, որ այժմ ներկրողներից պահանջում են ապրանքների ծագման հավաստագրեր տրամադրել։ Դրանց բացակայության կամ սխալ տեղեկատվության, ինչպես նաև ԱՄՆ-ը որպես արտադրության երկիր մատնանշելու դեպքում ռուս մաքսավորները կիրառում են բարձրացված սակագներ։ Որոշ ներմուծողներ հրաժարվում են սերտիֆիկատներ տրամադրել՝ վկայակոչելով ազգային օրենսդրության մեջ համապատասխան պահանջի բացակայությունը, ինչը դժվարացնում է ապրանքների ոչ ամերիկյան ծագումը հաստատելու հնարավորությունը:

2023 թվականին Դաշնային մաքսային ծառայությունը բյուջե է փոխանցել 6,6 տրիլիոն ռուբլի, ինչը գերազանցում է պլանը 158,6 միլիարդ ռուբլով։ Դաշնային մաքսային ծառայության ղեկավար Ռուսլան Դավիդովի կանխատեսմամբ՝ 2024 թվականին բյուջեի մուտքերի ծավալը կկազմի 7,4 տրիլիոն ռուբլի, ինչը 14% - ով ավելի է, քան նախորդ տարի։