ՏԵՍԱՆՅՈՒԹ․ Այնպես չի լինում, որ աշխատավարձը բարձրացնես և բանակն ավտոմատ դառնա մարտունակ․ Ալեքսանյան
Միայն ատեստավորմամբ զինված ուժերում զինծառայողների վարձատրությունը բարձրացնելու փորձերը համակարգային լուծում չեն, այդ առումով կարևոր ենք համարում բազային աշխատավարձի փոփոխության հարցը, որի շուրջ աշխատանք ենք իրականացնում: Այս մասին այսօր Ազգային ժողովում ասաց «Հայաստան» խմբակցության պատգամավոր Գեղամ Մանուկյանը։
Նրա խոսքով՝ արդեն մեկուկես տարի քննարկվում է զինծառայողների ատեստավորման որոշումը, որ ատեստավորմամբ աշխատավարձ է բարձրացվում։
«Մինչև հիմա ատեստավորմանը մասնակցել է 5908 զինծառայող։ Տպավորություն է ստեղծում իշխանությունը, որ զինծառայողների աշխատավարձը բարձրացել է։ 5908-ից 2957-ի աշխատավարձը չի բարձրացել, անբարար են ստացել։ Ոչ թե վատ զինծառայող են, գիտելիքներն է պակաս, այլ հազար տեսակ պատճառներ կան։ Ատեստացիան բալանասը չէ»,- ասաց ընդդիմադիր պատգամավորը։
ՔՊ-ական պատգամավոր, Պաշտպանության և անվտանգության մշտական հանձանաժողովի անդամ Վահագն Ալեքսանյանի խոսքով էլ՝ իրականում շատ վատ է, որ մեծ թվով զինծառայողներ չեն հաղթահարել աստեստավորումն ու անբավարար են ստացել։
«Ցավալի է սա, փաստացի ստացվում է, որ զինծառայողների մի մասը կամ չի կարողացել հանձնել ֆիզիկական պատրաստությունը, կամ կրակային պատրաստությունը, կամ մասնագիտական հարցերը։ Այն, ինչ իրենց աշխատանքի հետ է անմիջապես կապված, անբավարար են ստացել։ Մենք հիմա խնդիր ենք դնում և ասում՝ սիրելի՛ զինծառայողներ, պատրաստվեք, պարապեք, մի քանի բան շատ սովորեք։ Այսպես պետք է անել, որ և՛բանակը դառնա մարտունակ, և՛ ստանան նորմալ աշխատավարձ։ Այնպես չի լինում, որ աշխատավարձը բարձրացնես և բանակը ավտոմատ դառնա մարտունակ»,- ասաց Ալեքսանյանը։
Ըստ նրա՝ բանակն այն վիճակում է, որ ահագին թվով զինծառայող անբավարար է ստանում մարտական պատրաստությունից, կրակային պատրաստությունից:
