ՏԵՍԱՆՅՈՒԹ. Փաշինյանն անդրադարձել է Սերժ Սարգսյանի՝ օրերս արած հայտարարությանը
Վարչապետ Նիկոլ Փաշինյանն ԱԺ-կառավարություն հարցուպատասխանի ժամանակ անդրադարձել է Սերժ Սարգսյանի՝ օրերս արած հայտարարությանը, թե՝ «դարձա վարչապետ, որպեսզի այս արհավիրքը Հայաստանից հեռացնեմ»։
Վարչապետի խոսքով՝ Ս. Սարգսյանի խոսքերի կոնտեքստից զգացվում է, որ խոսքը ԼՂ խնդրի շուրջ առաջացող բարդությունների մասին է. «Այն ժամանակ, երբ նա կայացրել է որոշում՝ վերստին առաջադրվել վարչապետի թեկնածու, այդ պահին, ըստ նրա, ինքն իմացել է վերահաս արհավիրքի մասին։ Հետևաբար, սա մի հայտարարություն է, որ ոչ միայն վերահաստատում է 2018թ. դրությամբ ԼՂ հարցի բանակցային գործընթացի վերաբերյալ մեր գնահատականները, այլև նոր նյուանս է ավելացնում և վերահաստատում, ուժեղացնում գնահատականները»։
Ըստ Փաշինյանի՝ սա զրոյացնում է նրանց հայտարարությունները, թե իրենք դիվանագիտական հաղթանակների իրավիճակում են եղել 2017-18թթ.․ «Դիվանագիտական հաղթանակների վիճակում գտնվելը չի նշանակում երկիրը հասցրած լինել վերահաս արհավիրքի»։
Վարչապետը հարց է տվել՝ մինչև 2018թ. վարած բանակցությունների մասին ի՞նչ պետական, ինստիտուցիոնալ տեղեկատվություն կա երկրում. «4 էջ․ լավ, 4 չէ, ենթադրենք՝ մի հատ բարակ թղթապանակ։ Ես պատասխանատու ասում եմ՝ հետագայում երբ հարց ծագի, թե մեր շրջանում ինչ է եղել՝ հանդիպումներ, խոսակցություններ, քննարկումներ, մտքեր, Հայաստանի ոչ մի իշխանություն խնդիր չի ունենալու իմանալ, թե ով որտեղ, ինչ է խոսել։ Ինչ է ճիշտ խոսել, ինչ՝ սխալ, գնահատականի հարց է։ Բայց սա էլ շատ կարևոր նյուանս է»։
Փաշինյանը նշել է, որ նախկին իշխանության ներկայացուցիչների հետ փորձել է շփվել ու հասկանալ՝ ինչ է կատարվել։ Ըստ նրա՝ վերջիններս փորձել են վիրտուալ իրականություն ստեղծել և պատասխանել ճիշտ նույնկերպ, երբ պատասխանել են հարցերին, երբ ինքն ընդդիմադիր էր. «Ո՞նց է Սերժ Սարգսյանը և նրա թիմը պաշտոնանկությունից հետո կենցաղային հարցերով անընդհատ կառավարությանը նամակ-նամակի ետևից գրել, չէ՞ր կարող գրել՝ կառավարություն, վերահաս արհավիրքի առաջ եք, ուրեմն՝ էս, էս, էս եմ առաջարկում»։
