ՏԵՍԱՆՅՈՒԹ․ Լեհ ֆերմերները հացահատիկ են լցրել Ուկրաինայի հետ սահմանի անցակետի մոտ․ Ուկրաինայից արձագանքում են
Լեհ ֆերմերների գործողությունները, որոնք Ուկրաինական հացահատիկը լցրել են «Մեդիկա-Շեգինի» անցակետի մոտ գտնվող վագոնից, քաղաքական սադրանք են։ Այս մասին հայտարարել Է Ուկրաինայի համայնքների, տարածքների և ենթակառուցվածքների զարգացման նախարար Ալեքսանդր Կուբրակովը։ Տեղեկությունը փոխանցում է ՏԱՍՍ-ը։
«Ուկրաինական հացահատիկի ցրումը երկաթուղային գծերի երկայնքով ևս մեկ քաղաքական սադրանք է, որն ուղղված է մեր ժողովուրդների տարանջատմանը»,- գրել Է նա X-ում:
Այսօր Onet.pl պորտալը հղում անելով սոցցանցերում տեղադրված տեսանյութերին՝ հայտնել է, որ բողոքող լեհ ֆերմերները արգելափակել են երթևեկությունը լեհ-ուկրաինական սահմանին գտնվող երկաթուղու վրա՝ Մեդիկում, և կրկին հացահատիկ են լցրել երկաթուղային գնացքի վագոններից:
Ավելի վաղ նման միջադեպ էր տեղի ունեցել փետրվարի 11-ին Ուկրաինայի հետ սահմանին՝ Դորոխուսկայում։ Այդ ժամանակ լեհ ֆերմերները ցորեն էին լցնում Ուկրաինական մի քանի բեռնատարներից։ Լեհաստանի դատախազությունը հետաքննում է կատարվածը։ Ուկրաինայի վարչապետ Դենիս Շմիգալը հեռախոսով լեհ գործընկեր Դոնալդ Տուսկին հայտարարել է նման գործողությունների անթույլատրելիության մասին: Լեհաստանի Գյուղատնտեսության նախարարության ղեկավար Չեսլավ Սեկերսկին ներողություն է խնդրել բողոքող գյուղացիների արարքի համար։
Փետրվարի 9-ին լեհ ֆերմերները սկսեցին լայնածավալ բողոքի ցույցեր և Ուկրաինայի հետ սահմանին անցումների շրջափակում: Ֆերմերները պահանջում են սահմանափակել կամ ամբողջությամբ արգելել էժան գյուղատնտեսական արտադրանքի ներմուծումն Ուկրաինայից, ուժեղացնել աջակցությունը ազգային անասնաբուծությանը, ինչպես նաև անհամաձայնություն են հայտնում Եվրամիության «կանաչ գործարքի» ռազմավարության հետ, որը նախատեսում է մինչև 2050 թվականը հասնել զրոյական ածխածնի արտանետումների: Բողոքին աջակցել է Լեհաստանի Գյուղատնտեսության նախարարության ղեկավարությունը։
Հիշեցնենք՝ լեհ ֆերմերները, որոնք, ի նշան բողոքի, արգելափակում են Ուկրաինայի հետ սահմանի անցակետերը, ամբողջությամբ փակել են բեռնատարների անցումը, իսկ երեք անցակետերում նաեւ տրանսպորտի այլ տեսակներ չեն թողնում: Այս մասին հայտնել են Ուկրաինայի Պետական սահմանապահ ծառայությունից։
Այս պահին արգելափակված են 9 անցակետերից 6-ը։ Ինչպես հայտնում են ուկրաինական ԶԼՄ-ները, ավելի վաղ լեհ ցուցարարները ժամում մեկ բեռնատար էին բաց թողնում: Պետական սահմանային ծառայության տվյալներով՝ այժմ բոլոր վեց անցակետերում ամբողջովին արգելափակված է բեռնատարների երթևեկությունը։ Ընդ որում, երեք անցակետերում ժամանակավորապես թույլ չեն տա նաեւ մարդատար ավտոմեքենաներ եւ ավտոբուսներ, երթեւեկությունը բաց կլինի միայն մարդասիրական օգնության եւ խիստ կարեւոր բեռների համար:
Ուկրաինայի միջազգային փոխադրողների ասոցիացիայի փոխնախագահ Վլադիմիր Բալինի տվյալներով՝ օրվա ընթացքում ուկրաինա-լեհական սահմանին հերթերում կանգնած է եղել մոտ 4 հազար բեռնատար: Սահմանին տիրող իրավիճակը կտրուկ արձագանք է առաջացրել Կիևում։ Ուկրաինայի նախագահ Վլադիմիր Զելենսկին դա ծաղր է անվանել։
