Միամտություն է կարծել, որ ռուսները կհեռանան Դոնբասից, Լուգանսկից և Ղրիմից․ Սլովակիայի վարչապետ

Այն գաղափարը, որ Ռուսաստանը կթողնի Դոնբասը և Ղրիմը, «բացարձակապես անիրական է»։ Նման կարծիք է հայտնել Սլովակիայի վարչապետ Ռոբերտ Ֆիցոն hlavnespravy.sk լրատվական պորտալին տված հարցազրույցում։ Տեղեկությունը փոխանցում է ՏԱՍՍ-ը։

«Եթե ինչ-որ մեկը կարծում է, որ Ուկրաինայի հակամարտության միակ լուծումն այն է, որ ռուսները կվերադառնան սահման, որտեղ նրանք գտնվում էին մինչև հակամարտության սրումը՝ 2022 թվականի փետրվարին, և կհեռանան Ղրիմից, ապա դա բացարձակապես անիրատեսական է։ Մենք պետք է հարմարվենք նոր իրականությանը, որն այժմ զարգացել է։ Միամտություն է կարծել, որ ռուսները կհեռանան Դոնբասից և Լուգանսկից, միամտություն է կարծել, որ ռուսները կհեռանան Ղրիմից»,- ասել է Ֆիցոն։

Սլովակիայի վարչապետը վստահություն է հայտնել, որ Ուկրաինայում հակամարտության ռազմական լուծում գոյություն չունի:

«Շատ եմ ուզում, որ այս պատերազմն ավարտվի։ Հակառակ դեպքում, մենք ականատես կլինենք երկու կողմերի մեծ թվով զոհերի։ Ես չեմ կարող պատկերացնել, թե ինչպիսին կլինի Ռուսաստանի և Ուկրաինայի միջև խաղաղությունը, բայց այն կգա, և այդ խաղաղությունը ցավոտ կլինի»,- ասել է վարչապետը։

Սլովակիայի վարչապետը դեմ է Արևմուտքի կողմից Կիևի իշխանություններին զենք ուղարկելուն։ Ռազմական օգնությունը, Ֆիցոյի կարծիքով, միայն սրում է իրավիճակը։ Միևնույն ժամանակ, կառավարության ղեկավարը հանդես է գալիս Ուկրաինային բազմակողմանի մարդասիրական օգնություն ցուցաբերելու օգտին: