Ռուսական կողմը չէր զլանա ցույց տալ զոհվածների կադրերը, իսկ այժմ ցույց տալու բան չկա․ Դանիլով
Ուկրաինայի ազգային անվտանգության և պաշտպանության խորհրդի քարտուղար Ալեքսեյ Դանիլովը «Бабель» պարբերականին տված հարցազրույցում հայտարարել է, որ հունվարի 24-ին Բելգորոդի մոտ ընկած Իլ-76 ինքնաթիռում ուկրաինացի ռազմագերիներ չեն եղել:
«Մեր բանտարկյալներն այնտեղ եղե՞լ են, վստահաբար կարող եմ ասել՝ ոչ։ Ես սա ասում եմ՝ ելնելով Թեհրանից հետո մեր ունեցած փորձից և այն ամենից, ինչ տեղի ունեցավ հետո։ Եթե դա տեղի ունենար, ապա կենսաբանական նյութի քանակությունը, որը կոչվում է, ասենք, մեռած, զգալի քանակությամբ կլիներ», - ասաց Դանիլովը։
Բացի այդ, ԱԱՊԽ քարտուղարը ենթադրել է, որ եթե ինքնաթիռում իսկապես ուկրաինացի զինծառայողներ լինեին, ապա ռուսական կողմը չէր զլանա ցույց տալ զոհվածների կադրերը, իսկ այժմ, նրա կարծիքով, «ցույց տալու բան չկա»:
Ուկրաինական կողմը, հավելել է նա, չգիտի՝ արդյոք այս պահին ողջ են գերիները, որոնց պետք է փոխանակեին հունվարի 24-ին։
Իլ-76 ռազմատրանսպորտային ինքնաթիռը խոցվել էր հունվարի 24-ին Բելգորոդի մարզի Յաբլոնովո գյուղի շրջանում: Ռուսաստանի պաշտպանության նախարարությունը հայտարարել է, որ ինքնաթիռում եղել են 65 ուկրաինացի ռազմագերիներ, որոնց տեղափոխում էին փոխանակման համար, և կործանումն անվանել է ահաբեկչություն՝ դրանում մեղադրելով Ուկրաինային: Ուկրաինայի իշխանությունները հաստատել են, որ գերիների փոխանակումը նախապատրաստվել է, սակայն ընդգծել են, որ տվյալներ չունեն այն մասին, թե արդյոք օդանավում եղել են Ուկրաինայի զինված ուժերի զինծառայողներ:
Ռուսաստանի Քննչական կոմիտեն հայտարարել է, որ ինքնաթիռը խոցվել է ամերիկյան Patriot համալիրի հրթիռով, որն արձակվել է Խարկովի մարզի Լիպցի բնակավայրի շրջանից: Այն մասին, որ Իլ-76-ը խոցվել է ամերիկյան համալիրի հրթիռով, հայտարարել է նաև Վլադիմիր Պուտինը՝ թույլ տալով, որ Ուկրաինայի զինված ուժերը կարող էին անզգուշությամբ խոցել ինքնաթիռը: Այն մասին, որ Իլ-76-ը խոցվել է Patriot ԶՀՀ հրթիռով, անանուն լինելու պայմանով The New York Times-ին հայտնել են ամերիկացի պաշտոնյաները։
