Ռուսաստանի դերը հայ-ադրբեջանական կարգավորման հարցում այլընտրանք չունի․ Գալուզին

Ռուսաստանի դերը հայ-ադրբեջանական կարգավորման հարցում այլընտրանք չունի: Այս մասին ՌԴ փոխարտգործնախարար Միխայիլ Գալուզինը ասել է «Ռոսիա 24» հեռուստաալիքին տված հարցազրույցի ժամանակ՝ անդրադառնալով  հայ-ադրբեջանական խաղաղության բանակցություններին և կարգավորման գործընթացին:

Գալուզինը նշել է, որ Ռուսաստանի այսօրվա խնդիրն է օգնել իր գործընկերներին՝ Հայաստանին և Ադրբեջանին, դուրս գալ հաշտեցման և խաղաղ փոխգործակցության կայուն հետագիծ, որպեսզի տարածաշրջանում իրավիճակը լինի կայուն։

«Հենց Ռուսաստանի հովանու ներքո, հենց նախագահ Վլադիմիր Պուտինի նախաձեռնությամբ, ստեղծվեցին Հայաստանի և Ադրբեջանի միջև կարգավորման հիմքերը»,- ընդգծել է փոխարտգործնախարարը։

Նա նշել է, որ Ռուսաստանը օգնություն է ցուցաբերում խաղաղության պայմանագրի կնքման հետ կապված հարցերի ողջ շրջանակում։ Գալուզինը հավելել է, որ Ռուսաստանն իր խորհրդատվական ծառայություններն է առաջարկում հայ-ադրբեջանական սահմանի սահմանազատման հարցում, քանի որ տեղագրական նյութեր ունի։

Դիվանագետը հույս է հայտնել, որ արտաքին խաղացողներին ներգրավելու փոխարեն Հայաստանը կվերադառնա եռակողմ կարգավորման: Նա նաեւ նշել է, որ Մոսկվան միշտ պատրաստ է երկխոսության հարթակ տրամադրել։