ՏԵՍԱՆՅՈՒԹ․ Ինչո՞ւ 2024-ին թոշակները չեն բարձրանա․ Ֆինանսների նախարարը ներկայացրել է պատճառը

Հայաստանում 2024-ին կենսաթոշակները չբարձրացնելու որոշումը պայմանավորված է կառավարության ծախսային առաջնահերթություններով: Այս մասին ասուլիսում ասել է Ֆինանսների նախարար Վահե Հովհաննիսյանը:

Նա նշել է՝ այն, որ 2024-ին թոշակները չեն ավելանալու, որոշվել է 2022 թվականին:

«Այդ ժամանակ մենք ներկայացրել ենք միջնաժամկետ ծախսային ծրագիրը և գծել ենք այն ճանապարհը, որով մենք բարձրացնելու ենք թոշակները: Պատճառը, որ 2024-ին թոշակները չեն բարձրանալու, պայմանավորված է մեր ծախսային առաջնահերթություններով»,-ասել է Վահե Հովհաննիսյանը:

Վերջինիս խոսքով՝ Կառավարությունը կարծում է, որ պետք է պատասխանատու քաղաքականություն վարի և չստանձնի պարտավորություններ, որոնք ռիսկեր են ստեղծում դրանց չկատարման համար:

«Այսինքն՝ եթե մենք հիմա թոշակները բարձրացնենք այնքան, որքան մենք բոլորս երազում ենք, և հետո հանկարծ մի օր չկարողանանք այդ թոշակները չվճարել, շատ մեծ աղետ կլինի մեր երկրի համար: Հետևաբար՝ մենք պետք է շատ զգույշ լինենք»,-նշել է նախարարը:

Հովհաննիսյանը կարևորել է տնտեսական աճի պոտենցիալը բարելավելը, որ կառավարությունն ապագայում կարողանա ավելի մեծ ուժով լուծել սոցիալական խնդիրները:

Մանրամասները՝ տեսանյութում։