Կօգտագործենք ուժերի ողջ զինանոցը Հարավային Կորեան ամբողջությամբ ոչնչացնելու համար․ Կիմ Չեն Ըն
Փհենյանի հետ առճակատման քաղաքականությունը Սեուլի համար ինքնասպանություն է, ռազմական սադրանքի դեպքում Հյուսիսային Կորեան չի վարանի օգտագործել իր ողջ զինանոցը Կորեայի Հանրապետությունը ոչնչացնելու համար։ Այս մասին հայտարարել է Հյուսիսային Կորեայի զինված ուժերի գերագույն գլխավոր հրամանատար Կիմ Չեն Ընը՝ պաշտպանական արդյունաբերության ձեռնարկություններ կատարած այցի ժամանակ։ Տեղեկությունը փոխանցում է ՏԱՍՍ-ը։
«Եթե Կորեայի Հանրապետությունը փորձի զինված ուժեր օգտագործել մեր պետության դեմ կամ սպառնա մեր ինքնիշխանությանը և անվտանգությանը, մենք չենք վարանի օգտագործել առկա միջոցների և ուժերի ողջ զինանոցը Կորեայի Հանրապետությունն ամբողջությամբ ոչնչացնելու համար»,- նրա խոսքը մեջբերում է Կորեայի կենտրոնական հեռագրական գործակալությունը:
«Քանի դեռ Կորեայի Հանրապետության իշխող գանգստերները չեն գիտակցում Հյուսիսային Կորեայի հետ առճակատման ինքնասպան քաղաքականության սխալ լինելը, մեր Հանրապետությունը մշտապես կշարունակի ակնհայտ գործնական գործողությունները՝ հիմնված արդար պայքարի սկզբունքների վրա»,- հավելել է Կիմ Չեն Ընը։
Նա նշել է, որ Հյուսիսային Կորեան մտադիր չէ «միակողմանի» հրահրել «մեծ իրադարձություններ իր ճնշող ուժով» Կորեական թերակղզում, բայց նաև «չի նախատեսում խուսափել պատերազմից»։
Հյուսիսային Կորեայի առափնյա հրետանին վարժանքներ է անցկացրել հունվարի 5-ին՝ 192 արկ արձակելով կեղծ թիրախների վրա հարավկորեական Յոնպյոնդո և Պաենգյոնդո կղզիների ջրերում, բայց Հյուսիսային սահմանազատման գծից հյուսիս, որը Սեուլը համարում է իրական ծովային սահման: Ի պատասխան Կորեայի Հանրապետության զինված ուժերը նման զորավարժություններ են անցկացրել, սակայն արձակել են մոտ 400 արկ։ Սեուլը նշել է, որ հյուսիսկորեական արկերը պայթել են բուֆերային գոտում։
