21-րդ դարի ռեկորդային ցածր ջերմաստիճան` Ֆինլանդիայում
Ֆինլանդիայում 21-րդ դարի ջերմաստիճանային ռեկորդ է սահմանվել մինուս 44,3 աստիճանով: Այս մասին այսօր հայտնել է Ֆինլանդիայի օդերեւութաբանական ինստիտուտը: Տեղեկությունը փոխանցում է ՌԻԱ Նովոստին:
«Գիշերը Ֆինլանդիայում գրանցվել է 21-րդ դարի ընթացքում ամենացածր ջերմաստիճանը, երբ Էնոնտեկիե օդանավակայանում ջերմաստիճանը իջել է մինչև մինուս 44,3 աստիճան Ցելսիուսի»,- ասված է հաղորդագրության մեջ:
Հինգշաբթի ավելի վաղ երկրի հարավային և հարավ-արևմտյան մասերում սառնամանիքների պատճառով շուրջ 20 հազար սպառողներ մնացել էին առանց էլեկտրականության: Հինգշաբթի երեկոյան էլեկտրաէներգիայի մատակարարումը վերականգնվել է։
Բացի այդ, Ֆինլանդիայի վր պետական երկաթուղային ընկերությունը մինչև շաբաթվա վերջ չեղարկել է հեռահար գնացքների մի մասը սաստիկ սառնամանիքների պատճառով, չեղարկումը կազդի մոտ 10 հազար ուղևորի վրա, հայտնել է փոխադրողը:
Ֆինլանդիայում սառնամանիքների ֆոնին չորրորդ օրն անընդմեջ ուշանում են մերձքաղաքային և հեռահար գնացքները: Ուշացումները տատանվում են 30 րոպեից մինչև երեք ժամ: Որոշ երթուղիներ չեղարկվել են։ Բացի այդ, շարունակվող ցուրտը դժվարացրել է հասարակական տրանսպորտի երթեւեկությունը։
