Իրանում կոչ են արել խուսափել ԱՄՆ–ի հետ անմիջական ռազմական առճակատումից

Իրանի գերագույն ղեկավար Ալի Խամենեին Քերմանում տեղի ունեցած ահաբեկչությունից հետո հրամանատարներին կոչ է արել խուսափել ԱՄՆ–ի հետ անմիջական ռազմական առճակատումից և հրամայել է պատասխան գործողությունները սահմանափակել Իսրայելի դեմ գործողություններով և ամերիկյան բազաների վրա «պրոքսի խմբավորւմների» գրոհներով։ Այս մասին գրում է «New York Times» թերթը։

Խամենեին ավելի վաղ կոշտ պատասխան և արդարացի պատիժ էր խոստացել Քերմանում տեղի ունեցած ահաբեկչության կատարողներին և կազմակերպիչներին։ Սակայն աղբյուրները թերթին հայտնել են, որ Իրանի գերագույն ղեկավարը հրամանատարներին հորդորել է ռազմավարական համբերություն դրսևորել և ամեն գնով խուսափել Վաշինգտոնի հետ անմիջական ռազմական բախման մեջ Թեհրանի ներգրավումից։

«Նա զինվորականներին հրամայել է պատասխան գործողությունները սահմանափակել Իսրայելի դեմ գաղտնի գործողություններով կամ Սիրիայում և Իրաքում գտնվող ամերիկյան բազաների վրա պրոքսի խմբավորումների հարձակումներով», – գրում է պարբերականը։

Աղբյուրի տեղեկություններով` Խամենեին Իրանում և Լիբանանում տեղի ունեցած հարձակումները իսրայելական արշավի մաս է համարում։

Հիշեցնենք, որ երեկ Իրանում պայթյուններ էին որոտացել, որոնց հետևանքով կան մեծաթիվ զոհեր և վիրավորներ: Մի քանի պայթյուն էր որոտացել Քերմանի գերեզմանատանը։ Այդ ժամանակ այնտեղ ընթանում էր Ղասեմ Սոլեյմանիի հիշատակի արարողություն՝ նա սպանվել է 2020 թվականի հունվարի 3-ին Բաղդադի օդանավակայանի մոտ ԱՄՆ ռազմաօդային ուժերի հրթիռային հարվածի արդյունքում։ Tasnim գործակալությունը գրում է, որ գերեզմանատան մուտքի մոտ եղել է երկու փաթեթ՝ ռումբերով, որոնք կարող էին պայթեցնել հեռահար։

Իշխանությունները Քերմանում տեղի ունեցած պայթյուններն ահաբեկչական հարձակում են որակել։