Արարատ Միրզոյանը` Ադրբեջանի հետ բանակցությունների մասին

Հայաստանի ԱԳ նախարար Արարատ Միրզոյանը, պատասխանելով «3+3» ձևաչափի մասին հարցին, խոսել է Հարավային Կովկասում խաղաղության հաստատումից։

ԱԳ նախարարը, մասնավորապես, հայտարարել է. «Հայաստանը բարեխղճորեն և կառուցողական կերպով ներգրավված է Ադրբեջանի հետ բանակցություններում՝ խաղաղության հաստատման ու հարաբերությունների կարգավորման համար։

Մենք Ադրբեջանի հետ մի քանի ուղղություններով և փուլերով բանակցել ենք և կոնկրետ խաղաղության համաձայնագրի վրա ենք աշխատում։ Շատերը պնդում են, որ իրական հնարավորություն կա այս գործընթացը տրամաբանական ավարտի հասցնելու համար։ Մենք, իրոք, ունենք այդ հնարավորությունը՝ չնայած ԼՂ բնակչության բռնի տեղահանությանն ու ատելության խոսքին, և ամեն ինչ անում ենք, որ այս գործընթացը հասնի իր տրամաբանական ավարտին»։

Նա նաև նշել է. «Ադրբեջանի հետ բանակցություններում մենք տեսնում ենք և՛ դրական, և՛ բացասական ազդակներ, ինչպիսին օրինակ, պարբերաբար Ադրբեջանից հնչող ագրեսիվ կոչերն են և բարձրաստիճան հանդիպումներից խուսափելը»: