Սի Ծինփինը նախազգուշացրել է Բայդենին
Սան Ֆրանցիսկոյում Չինաստանի ղեկավար Սի Ծինփինի և նախագահ Ջո Բայդենի վերջին գագաթնաժողովի ժամանակ Սի Ծինփինը բաց տեքստով ասել է, որ Պեկինը վերամիավորելու է Թայվանը մայրցամաքային Չինաստանի հետ, սակայն այդ գործողության հստակ ժամկետը դեռ որոշված չէ: Այս մասին՝ վկայակոչելով ԱՄՆ երեք ներկա և նախկին պաշտոնյայի, գրում է nbcnews-ը:
Պաշտոնյաների խոսքով՝ խմբային հանդիպման ժամանակ, որին մասնակցել են մեկ տասնյակ ամերիկացի և չինացի պաշտոնյաներ, Սին Բայդենին ասել է, որ Չինաստանի նախապատվությունը Թայվանը խաղաղ ճանապարհով, այլ ոչ թե ուժով միացնելն է:
Հաղորդվում է, որ Չինաստանի առաջնորդը նաև անդրադարձել է ԱՄՆ ռազմական իշխանությունների հրապարակային կանխատեսումներին, ըստ որոնց՝ Չինաստանը ծրագրում է Թայվանը վերամիավորել 2025 կամ 2027 թվականներին: Սին Բայդենին ասել է, որ նրանք սխալվում են, քանի որ նա չի սահմանել ժամանակային շրջանակ:
Չինացի պաշտոնյաները նաև գագաթնաժողովից առաջ խնդրել են, որ Բայդենը հանդիպումից հետո հրապարակային հայտարարություն անի՝ ասելով, որ ԱՄՆ-ն աջակցում է Թայվանի հետ խաղաղ միավորման Չինաստանի նպատակին և չի աջակցում Թայվանի անկախությանը։ Սպիտակ տունը մերժել է չինացիների խնդրանքը։
Նշվում է նաև, որ Սպիտակ տունը հրաժարվել է մեկնաբանել այս տեղեկությունը։
