ՌԴ փոխվարչապետը՝ «Խաղաղության խաչմերուկ» նախագծի մասին

ՌԴ-ն մասնակցում է ՀՀ իշխանությունների առաջարկած «Խաղաղության խաչմերուկ» նախագծի իրականացմանը։ Այս մասին Երևանում միջկառավարական հանձնաժողովի նիստի ժամանակ ասել է ՌԴ փոխվարչապետ Ալեքսեյ Օվերչուկը։

Վերջինիս խոսքով՝ Կայունացման և զարգացման եվրասիական հիմնադրամի միջոցով ֆինանսավորվում է «Հյուսիս–հարավ» ավտոճանապարհային միջանցքի 4–րդ հատվածի կառուցումը, որն ըստ էության նախագծի բաղկացուցիչ մասն է: Այդ մասով, ըստ նրա, աջակցության ծավալն այժմ կազմում է 150 մլն դոլար։

«Հիմնադրամի կոլեգիալ մարմինների համաձայնեցմանն է ներկայացվել Քաջարանի թունելի կառուցմանն աջակցելու մասին որոշումը։ Այս հարցում աջակցության ծավալը կկազմի 200 մլն դոլար»,– տեղեկացրել է Օվերչուկը։ 

Նա հայտնել է, որ հիմնադրամը նախատեսում է 10 նախագիծ իրականացնել ՀՀ–ում, ներդրումների պորտֆելը գնահատվում է 533 մլն դոլար, ևս 300 մլն դոլարի նախագծեր քննարկման փուլում են։