Ամոթալի գիշեր՝ թուրքական ֆուտբոլի համար
Թուրքիայի ֆուտբոլի ֆեդերացիան երկուշաբթի օրը մրցավարին ծեծի ենթարկելու պատճառով հետաձգել է երկրի բոլոր առաջնություններում կայանալիք հանդիպումները։ Այս մասին տեղեկանում ենք ՌԻԱ Նովոստիից։
«Թուրքիայի ֆուտբոլի ֆեդերացիան շտապ նիստ է անցկացրել: Մենք բոլոր առաջնություններում անորոշ ժամանակով հետաձգել ենք հանդիպումները: Այս հարձակումը ամոթալի գիշեր է թուրքական ֆուտբոլի համար: Մենք կարծում ենք, որ թուրքական ֆուտբոլն արժանի չէ դրան»,-ասել է Ֆուտբոլի ֆեդերացիայի նախագահ՝ Մեհմեդ Բույուկեքսին։
Հաղորդվում է նաև, որ ֆուտբոլային ակումբի նախագահն, ով հարվածել է մրցավարին, ձերբակալվել է։ Նրանից բացի կալանավորված է ևս երկու մարդ։
Հիշեցնենք՝ ավելի վաղ հայտնել էինք, որ «Անկարագյուջյու» ակումբի նախագահ Ֆարուք Քոջան հարվածել է մրցավար Հալիլ Ումութ Մելերին Անկարայում ընթացող «Ռիզեսփորի» հետ Թուրքիայի առաջնության 15-րդ տուրի խաղի վերջնամասում (1:1)։ Երկրորդ խաղակեսում մրցավարը խաղադաշտից հեռացրել էր նրա թիմի ֆուտբոլիստների մեկին։ Եզրափակիչ սուլիչից հետո նախագահը մի քանի հոգու ուղեկցությամբ վազել է խաղադաշտ ու հարվածել մրցավարին։
