Իսրայելը 2022 թվականից գիտեր ՀԱՄԱՍ-ի ծրագրերի մասին. NYT
Իսրայելի պաշտոնյաները հոկտեմբերի հարձակումից ավելի քան մեկ տարի առաջ փաստաթղթեր են ստացել արմատական պաղեստինյան ՀԱՄԱՍ շարժման՝ Իսրայել ներթափանցելու ծրագրերի մասին, սակայն դրանք լուրջ չեն ընդունել՝ դրանք չափազանց հավակնոտ համարելով։ Այս մասին հինգշաբթի օրը հայտնել է The New York Times-ը՝ վկայակոչելով Իսրայելի պաշտոնյաների փաստաթղթերն ու էլեկտրոնային նամակները։
Հրապարակման տվյալներով՝ ՀԱՄԱՍ-ի ծրագրերի վերաբերյալ 40 էջանոց փաստաթուղթը չի պարունակում գործողության ճշգրիտ ամսաթիվը, այլ նկարագրում է իսրայելական բոլոր ամրությունները, զինված ուժերի դիրքն ու հզորությունը: Իսրայելցի վերլուծաբանները համարել են, որ նման գործողության մասշտաբները դուրս են ՀԱՄԱՍ-ի հնարավորություններից և այն հավակնոտ պլան են անվանել։
Ինչպես նշում է թերթը, պաղեստինյան շարժումն այս պլանին հետևել է «զարմանալի ճշգրտությամբ»։ Պաշտոնյաները խոստովանել են, որ եթե լուրջ վերաբերվեին այդ փաստաթղթին, Իսրայելը կարող էր պատրաստվել կամ խուսափել հոկտեմբերի 7-ին ՀԱՄԱՍ-ի զինյալների ներթափանցումից:
