Հայտնի է Գազայի հատվածում զոհերի թիվը` Իսրայելի կողմից հարձակումները վերսկսելուց հետո
Ավելի քան 20 պաղեստինցի է զոհվել այն բանից հետո, երբ Իսրայելը վերսկսել է հարձակումները Գազայի վրա. Այս մասին, Al Jazeera-ի փոխանցմամբ, հայտնել են անկլավի առողջապահության ոլորտի պաշտոնյաների:
Իսրայելական բանակը տարածում է թռուցիկներ՝ կոչ անելով ռմբակոծվող հարավային Գազայի հատվածներում բնակվող մարդկանց հեռանալ:
Հիշեցնենք, որ այսօր Իսրայելի բանակը վերսկսել է ռազմական գործողությունները Գազայում:
Պաղեստինյան ՀԱՄԱՍ խմբավորումը մինչև առավոտյան ժամը 7-ը Իսրայելին չի տրամադրել պատանդների ցուցակը, որոնք պետք է այսօր ազատ արձակվեն: Բացի այդ, ՀԱՄԱՍ-ը խախտել է հրադադարի պայմանավորվածությունը և հրթիռներ է արձակել Իսրայելի ուղղությամբ։
Ի պատասխան Իսրայելի պաշտպանության բանակը հայտարարել է, որ վերսկսել է խմբավորման դեմ հարձակումները:
Իսրայելի պաշտպանության բանակը նաև նշել է, որ իր կործանիչները ավիահարվածների շարք են իրականացնում Գազայի հատվածում ՀԱՄԱՍ-ի թիրախների ուղղությամբ:
Երկրի վարչապետ Բենիամին Նեթանյահուի գրասենյակի հայտարարության մեջ ասվում է, որ ՀԱՄԱՍ-ը «խախտել է պայմանավորվածությունը, չի կատարել բոլոր պատանդ կանանց ազատ արձակելու իր պարտավորությունը և հրթիռներ է արձակել Իսրայելի վրա»:
«Մարտերի վերսկսման պայմաններում մենք շեշտում ենք, որ Իսրայելի կառավարությունը հանձնառու է հասնելու պատերազմի նպատակներին՝ ազատ արձակել մեր պատանդներին, վերացնել ՀԱՄԱՍ-ը և երաշխավորել, որ Գազան երբեք այլևս չի կարող սպառնալ Իսրայելի ժողովրդին»,- ասվում է հայտարարությունում:
