Լավրովն ասել է, թե ինչ ճակատագիր են պատրաստել արևմտյան երկրները Մոլդովային

Հաջորդ պետությունը, որը կտուժի Ռուսաստանի Դաշնության դեմ արևմտյան քաղաքական գործիչների կողմից սանձազերծված հիբրիդային պատերազմի պատճառով, կարող է լինել Մոլդովան։ Այս մասին ՌԴ ԱԳՆ ղեկավար Սերգեյ Լավրովը հայտարարել է Եվրոպայում անվտանգության և համագործակցության կազմակերպության (ԵԱՀԿ) անդամ երկրների արտգործնախարարների հանդիպման ժամանակ, փոխանցում է РИА Новости-ն։

Նրա խոսքով՝ ՆԱՏՕ-ն և Եվրամիությունը (ԵՄ) ձգտում են ոչնչացնել 5+2 ձևաչափով բանակցային հարթակը։ Վերջինս ուղղված է Մերձդնեստրյան խնդրի լուծմանը։

Ինչպես նշել է ՌԴ ԱԳ նախարարը, տարածաշրջանում իրավիճակի հանգուցալուծման տապալված փորձերից մեկը Կոզակի հուշագիրն է։ Լավրովն ընդգծել է, որ համապատասխան պլանը կարող էր արդյունք տալ 20 տարի առաջ։

«ՆԱՏՕ-ն և ԵՄ-ն Բրյուսելն այնուհետև առանց արարողակարգի տորպեդահարեցին Քիշնևի և Տիրասպոլի կողմից արդեն իսկ նախաստորագրված փաստաթուղթը, իսկ այժմ վերացնում են «5+2» ձևաչափը՝ վերջին բանը, որ մնում է Մերձդնեստրի կարգավորման համատեղ ջանքերից»,- ընդգծել է Մոսկվայի ներկայացուցիչը։

Այդ կապակցությամբ նա չի բացառել, որ արեւմտյան պետությունները մտադիր են զոհաբերել Մոլդովան՝ որպես Ռուսաստանի դեմ հիբրիդային պատերազմի մի մաս։

«5+2» ձևաչափի մասնակիցներն են Քիշնևը, Տիրասպոլը, Ռուսաստանը, Ուկրաինան և ԵԱՀԿ-ն։ Վերջին երեքը ներգրավված են բանակցային գործընթացում որպես միջնորդներ, իսկ ԱՄՆ-ն և ԵՄ-ն մասնակցում են աշխատանքին որպես դիտորդներ։

Վերջին անգամ այս ձևաչափով հանդիպում տեղի է ունեցել 2019 թվականի հոկտեմբերին։ Միջոցառումը տեղի է ունեցել Սլովակիայի մայրաքաղաքում։