Ուկրաինայի ԱԳՆ ղեկավարը հրաժարվել է մասնակցել ԵԱՀԿ նիստին. հայտնի է պատճառը
Ուկրաինայի արտգործնախարար Դմիտրի Կուլեբան չի մասնակցի Եվրոպայում անվտանգության և համագործակցության կազմակերպության (ԵԱՀԿ) նիստին Հյուսիսային Մակեդոնիայում՝ իր ռուս գործընկեր Սերգեյ Լավրովի մասնակցությամբ։ Այս մասին հայտարարել է Ուկրաինայի գերատեսչության մամուլի քարտուղար Օլեգ Նիկոլենկոն։
«Ուկրաինական պատվիրակությունը չի մասնակցի ԵԱՀԿ նախարարների հանդիպմանը արտաքին գործերի նախարարի մակարդակով (Ռուսաստանի պատվիրակության մասնակցությամբ՝ Սերգեյ Լավրովի գլխավորությամբ)»,- սոցցանցերում ընդգծել է Օլեգ Նիկոլենկոն։ Նա Ռուսաստանին մեղադրել է «ԵԱՀԿ-ն ոչնչացնելու մեջ»։
Ընթացիկ տարվա նոյեմբերի 30-ից դեկտեմբերի 1-ը նախատեսված է 57 մասնակից երկրների արտգործնախարարների հանդիպումը։ Այն կկայանա Սկոպյեում։ Հյուսիսային Մակեդոնիան կբացի երկինքը Ռուսաստանի Դաշնության առջև ԵԱՀԿ գագաթնաժողովից առաջ, հայտնում է Life-ը։
Հավելենք նաև, որ Բալթյան երկրների արտգործնախարարները՝ Էստոնիայի արտգործնախարար Մարգուս Ցահկնան, Լիտվայի ԱԳ նախարար Գաբրիելիուս Լանդսբերգիսը և Լատվիայի ԱԳ նախարար Կրիսյանիս Կարինսը համատեղ հայտարարություն են տարածել, որում հայտարարել են Սկոպյեում ԵԱՀԿ նախարարական հանդիպմանը մասնակցելուց հրաժարվելու մասին՝ կապված ՌԴ ԱԳՆ ղեկավար Սերգեյ Լավրովի եւ ռուս գործընկերների ծրագրված ներկայության հետ։
