«Բացի ՌԴ-ից ոչ ոք ի վիճակի չէ Ղարաբաղում խաղաղության և կայունության երաշխավորի դերը ստանձնել»․ Պեսկով

Արևմուտքը փորձում է դուրս մղել Ռուսաստանի Դաշնությունը Ղարաբաղից։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։ Նրա խոսքով, բացի Ռուսաստանի Դաշնությունից ոչ ոք ի վիճակի չէ այս տարածաշրջանում խաղաղության և կայունության երաշխավորի դերը ստանձնել։

«Մի շարք երկրներ դեռ փորձում են ապակայունացնել իրավիճակը Ղարաբաղի շուրջ»,- ասել է Պեսկովը լրագրող Պավել Զարուբինի հետ զրույցում «Ռոսիա 1»-ի եթերում։ Նա նշել է, որ Ադրբեջանը հայտարարել է, որ Արևմուտքը չի կարող հավակնել միջնորդի դերին, քանի որ միակողմանի դիրք է գրավել։

«Դե հասկանում եք, հավանաբար, երեք, չորս, հինգ տարի առաջ նման պայքար էր մղվում դիվանագիտական դիմակներներով։ Հիմա այդ դիմակները վաղուց արդեն մի կողմ են նետված, և պայքարն ուղիղ ճակատով է մղվում՝ առանց երկմտելու։ Իրոք, մի շարք երկրներ նախկինի պես փորձում են ապակայունացնել իրավիճակը Ղարաբաղի շուրջ, ինչն, ի դեպ, հանգեցրել է նրան, որ ադրբեջանական կողմը պաշտոնապես հայտարարել է, որ այդ մի շարք երկրներ արդեն հազիվ թե կարող են հավակնել միջնորդի դերի, քանի որ միակողմանի են դիրքավորվել»,- ասել Է Պեսկովը։

ՌԴ նախագահի մամուլի քարտուղարը շեշտել է, որ նման միակողմանի դիրքորոշում որդեգրելով՝ ինչ-որ բանի հավակնելն անտեղի է։