ԱՄՆ-ն հիասթափված է Իսրայելից
Ամերիկյան իշխանությունները «ավելի ու ավելի են հիասթափվում» Գազայի հատվածում պաղեստինյան ՀԱՄԱՍ շարժման դեմ Իսրայելի գործողություններից՝ զոհերի թվի աճի եւ Իսրայելին ուղղված ԱՄՆ-ի կոչերի պատճառով, հայտնում է Bloomberg գործակալությունը՝ վկայակոչելով իր աղբյուրները: Տեղեկությունը փոխանցում է ՌԻԱ Նովոստին։
Գործակալության տեղեկություններով՝ ԱՄՆ նախագահ Ջո Բայդենի վարչակազմի պաշտոնյաներն ակտիվացրել են շփումները Իսրայելի հետ, նրանք «ավելի ու ավելի բարդ զրույցներ» են անցկացնում իսրայելցի գործընկերների հետ, սակայն Իսրայելն անտեսում է ամերիկյան իշխանությունների կոչերը:
«Սպիտակ տունն ավելի ու ավելի է հիասթափվում այն բանից, թե ինչպես է Իսրայելը պատերազմ մղում ՀԱՄԱՍ-ի դեմ, քանի որ խաղաղ բնակչության շրջանում զոհերի թիվն աճում է, իսկ վարչակազմի կոչերն անուշադրության են մատնվում, ինչն ուժեղացնում է մերձավոր դաշնակիցների պառակտումը»,- ասվում է նյութում:
Գործակալության զրուցակիցները նշել են, որ ԱՄՆ-ն բազմիցս նախազգուշացրել Է Իսրայելին քաղաքացիական բնակչությանը պաշտպանելու անհրաժեշտության մասին, սակայն Իսրայելի վարչապետ Բենյամին Նեթանյահուն «մինչ այժմ անտեսել է ԱՄՆ-ի մտահոգությունը Գազայում պատանդ մնացած ամերիկացիների եւ պաղեստինյան ծագում ունեցող հարյուրավոր ամերիկացիների վերաբերյալ, որոնք չեն կարող լքել Գազայի հատվածի տարածքը»:
Երբ ԱՄՆ-ը հարցրել է փախստականների ճամբարին իսրայելական հարվածի մասին, «Իսրայելի պատասխանը գրեթե արհամարհական է եղել, իսկ ղեկավարությունը հայտարարել է, որ իր նպատակին հասել է», ընդգծում է պարբերականը:
