Գնալով ավելի դժվար է դառնում Ուկրաինային օգնություն ցուցաբերել․ ՆԱՏՕ-ի գլխավոր քարտուղարի օգնական
Ուկրաինային խոստացել են անդամակցել ՆԱՏՕ-ին, սակայն այդ գործընթացի կոնկրետ ժամանակացույց այժմ գոյություն չունի։ Asahi թերթին տված հարցազրույցում այս մասին հայտարարել է այցով Ճապոնիայում գտնվող Հյուսիսատլանտյան դաշինքի գլխավոր քարտուղարի օգնական Դեւիդ Վան Վիլը։ Տեղեկությունը փոխանցում է ՏԱՍՍ-ը։
Նա նշել է, որ ՆԱՏՕ-ին անդամակցելու համար Կիևը պետք է կատարի մի քանի պայման։
«Ռուսաստանի հետ պատերազմի հետ մեկտեղ՝ Ուկրաինան այժմ բախվում է իր կառավարման համակարգի արդիականացման պայքարին։ Սա շատ կարևոր խնդիր է։ Ես հիմա չեմ կարող մատնանշել ՆԱՏՕ-ին Ուկրաինայի անդամակցության կոնկրետ ժամանակացույցը։ Մենք ցանկանում ենք խուսափել ներկայիս պատերազմի էսկալացիայից մինչև ՆԱՏՕ-ի և Ռուսաստանի միջև առճակատումը։ Պետք է հասկանալ՝ կարո՞ղ ենք պատերազմի պայմաններում որոշել, թե արդյոք Ուկրաինան իր կառավարման համակարգում հասել է որոշակի մակարդակի։ Բայց ՆԱՏՕ-ին անդամակցությունը նրան խոստացված է»,- հավելել է նա։
«Պատերազմի ձգձգման հետ մեկտեղ՝ գնալով ավելի դժվար է դառնում Ուկրաինային օգնություն ցուցաբերելը», - խոստովանել է գլխավոր քարտուղարի օգնականը,։
Միաժամանակ նա հավաստիացրել է, որ Կիևին զենքի և դրամական միջոցների տրամադրումը կշարունակվի:
Ուկրաինայի նախագահ Վլադիմիր Զելենսկին բազմիցս հայտարարել է, որ եկել է Ուկրաինային ՆԱՏՕ հրավիրելու պահը։ 2022 թվականի սեպտեմբերի վերջին նա ստորագրել է դաշինքին արագացված կարգով անդամակցելու հայտը։ Ավելի ուշ ԵՄ ներքին շուկայի հարցերով եվրահանձնակատար Թիերի Բրետոնը հայտարարել է, որ Ուկրաինան չի կարող անդամակցել ՆԱՏՕ-ին իր տարածքում ռազմական գործողությունների պայմաններում: Այնուամենայնիվ, Ուկրաինայի իշխանությունները ակնկալում էին դաշինքի հրավեր ստանալ այս տարվա հուլիսին Վիլնյուսում կայանալիք գագաթնաժողովում: Սակայն այն ժամանակ Կիևին հրավիրելու ժամկետների վերաբերյալ կոնկրետ որոշումներ չեն կայացվել։
