Էրդողանի հայտարարություններն, անկասկած, անհեթեթ են․ Շոլց

Պաղեստինա-իսրայելական հակամարտության վերաբերյալ Թուրքիայի նախագահ Ռեջեփ Թայիփ Էրդողանի կողմից Իսրայելի դեմ առաջադրված մեղադրանքներն անհեթեթ են, Թել Ավիվը հետևում է միջազգային նորմերին և մարդու իրավունքներին, հայտարարել է Գերմանիայի կանցլեր Օլաֆ Շոլցը Հունաստանի վարչապետ Կիրիակոս Միցոտակիսի հետ համատեղ մամուլի ասուլիսում: Տեղեկությունը փոխանցումէ ՌԻԱ  Նովոստին։

«Սա մի երկիր է, որը պարտավորվել է պահպանել մարդու իրավունքները և միջազգային իրավունքները, և իր գործողություններում գործում է համապատասխան ձևով։ Եվ այդ պատճառով Իսրայելի դեմ այդ մեղադրանքները, անկասկած, անհեթեթ են», - պատասխանել է Շոլցը այն հարցին, թե արդյոք Գազայում Իսրայելի գործողությունների մասին Էրդողանի հայտարարությունները կարմիր գիծ չեն Բեռլինի համար։ 

Շոլցը ևս մեկ անգամ հստակեցրել է, որ ՀԱՄԱՍ-ը, գերմանական կառավարության տեսանկյունից, ահաբեկչական կազմակերպություն է, և Իսրայելն իրավունք ունի դրա դեմ պաշտպանվել Գազայի տարածքում:

«Իրավիճակը, որի դեպքում ՀԱՄԱՍ-ը կրկին հանգստանալու, զենք կուտակելու և Իսրայելի վրա հարձակվելու հնարավորություն կստանա, անընդունելի է։ Այս հարցում մենք հստակ կանգնած ենք Իսրայելի կողքին, որը ժողովրդավարական պետություն է, ինչում կասկած չկա», - հավելել է նա։ 

Մամուլի ասուլիսը հեռարձակվել է Գերմանիայի կառավարության կայքում։

Ավելի վաղ Էրդողանը հայտարարել էր, որ Նեթանյահուին չի համարում «իր զրուցակիցը», իսկ ՀԱՄԱՍ-ն՝ ահաբեկչական կազմակերպություն: Քաղաքական գործիչը հերթական անգամ Իսրայելի գործողություններն անվանել է «ֆաշիստական», ինչը, նրա կարծիքով, հարցականի տակ է դնում պետության լեգիտիմությունը: Ի թիվս այլ բաների, Թուրքիայի ղեկավարը գերմանական կառավարությանը մեղադրել է Գազայում «իսրայելական կոտորածի» վերաբերյալ հստակ դիրքորոշում չունենալու մեջ։