Մենք չենք հանձնվում․ Գերմանիայի ՊՆ-ն՝ Ուկրաինային զինելու մասին

Գերմանիայի ՊՆ-ն հաստատել է 2024 թվականին Ուկրաինային ռազմական օգնությունը կրկնապատկելու ծրագրերը։

Գերմանիայի պաշտպանության նախարար Բորիս Պիստորիուսը հայտարարել է, որ Բեռլինը մտադիր է 2024 թվականին կրկնապատկել ռազմական օգնությունն Ուկրաինային: Այդ նպատակների համար նախատեսված 4 մլրդ եվրոյի փոխարեն նախատեսվում է ծախսել 8 մլրդ եվրո։ Տեղեկությունը հայտնում է kommersant.ru-ն։

«Սա ուժեղ ազդանշան Է Ուկրաինային, որը ցույց է տալիս, որ մենք չենք հանձնվում»,- ասել է Պիստորիուսը ARD հեռուստաալիքին:

Նա որոշումը բացատրել է 2023 թվականի փորձով, «որը ցույց է տվել, որ նախատեսված գումարներն արագ սպառվել են»։ 

Կոալիցիոն կառավարությունն ավելի վաղ համաձայնության էր եկել 2024 թվականին օգնության սկզբնական գումարը կրկնապատկելու վերաբերյալ: Որոշումը պետք է հաստատվի խորհրդարանում քվեարկությամբ: Օգնությունը կրկնապատկելու պլանների մասին ավելի վաղ հայտնել էին գերմանական և ամերիկյան լրատվամիջոցները:

Գերմանիան Ուկրաինային 22 մլրդ եվրո ռազմական, հումանիտար և ֆինանսական օգնություն է տրամադրել Ռուսաստանի հետ հակամարտության սկզբից ի վեր։  Մեծ Բրիտանիայի պաշտպանության նախկին նախարար Բեն Ուոլեսը հոկտեմբերին հայտնել էր, որ Լոնդոնը Բեռլինին զիջել է Ուկրաինայի եվրոպական խոշորագույն դոնորի կարգավիճակը: