Ադրբեջանը վերջին երկիրն է, որ կարող է որոշել, թե Ֆրանսիան ինչ շահեր ունենա․ Մարուքյանը՝ Բաքվի քննադատության մասին
Ցանկացած սպառազինության ձեռքբերում Հայաստանի հիմնարար իրավունքն է, և Երևանն այն կգնի որ երկրից հնարավոր լինի՝ ինքնապաշտպանության համար։ Այս մասին «Ազատությանն» ասել է Հայաստանի հատուկ հանձնարարություններով դեսպան Էդմոն Մարուքյանը:
Անդրադառնալով թեմայի շուրջ ադրբեջանական կողմի հայտարարություններին Մարուքյանը նշել է․
«Բնականաբար, այս սպառազինությունները ագրեսիվ նպատակ չունեն, այդ սպառազինություններն ունեն պաշտպանական նպատակ, և դա Հայաստանի հիմնարար իրավունքն է ու այն պետք է իրացվի, այն իրացվել է, իրացվելու է և իրացվում է հենց հիմա: Հետևաբար Ադրբեջանի նման հայտարարություններն ուղղակի զարմանալի են»։
Ըստ Մարուքյանի՝ Ադրբեջանը չի կարող որոշել, թե ինչ շահեր ունենա Ֆրանսիան։
«Ադրբեջանը վերջին երկիրն է, որ կարող է որոշել, թե Ֆրանսիան ինչ շահեր ունենա տարածաշրջանում կամ իր բարեկամ պետությունների հետ, հետևաբար խոսել Ֆրանսիայի սխալ շահերի մասին, այն էլ Ադրբեջանի կողմից, ուղղակի զավեշտ է, ըստ էության»,- նշել է Մարուքյանը:
