ՏԵՍԱՆՅՈՒԹ․ Պուտինը՝ որոշ երկրների՝ ԱՊՀ-ում լեգիտիմ իշխանությունը սպանելու փորձերի մասին

Որոշ երկրներ փորձում են խաթարել օրինական իշխանությունը, ավանդական արժեքները և ընդհանուր առմամբ իրավիճակը ԱՊՀ երկրներում։ Այդ մասին ՌԴ նախագահ Վլադիմիր Պուտինը հայտարարել է ԱՊՀ Անվտանգության խորհրդի քարտուղարների հանդիպման մասնակիցներին ուղղված տեսաուղերձում։ Այս մասին տեղեկանում ենք ՏԱՍՍ-ից։ 

«Գլոբալ անկայունությունը փոխանցվում է նաև Եվրասիա: Ավելին, որոշ երկրների գործողություններն ուղղակիորեն ուղղված են ԱՊՀ երկրներում լեգիտիմ իշխանությունը, սոցիալական կայունությունը և ավանդական արժեքները, մեր ավանդական սերտ առևտրային, համագործակցության և մշակութային կապերը խաթարելուն»,- ասել է նա։

Պուտինը ուշադրություն է հրավիրել նրան, որ ԱՊՀ երկրների համար ընդհանուր սպառնալիքներ են մնում ահաբեկչությունն ու կազմակերպված հանցավորությունը, թմրամիջոցների ապօրինի շրջանառությունը և անօրինական միգրացիան, արմատականությունն ու ծայրահեղականությունը, ինչպես նաև ռիսկերը տնտեսական, տեղեկատվական, տեխնոլոգիական և կենսաբանական անվտանգության ոլորտում։

«Այս ամենը պահանջում է ոչ միայն համաձայնեցված հավաքական արձագանք, այլև ավելի մեծ կանխիչ աշխատանք։ Այդ թվում կարևոր է առավելագույնս օգտագործել անվտանգության խորհուրդների կանխատեսման, տեղեկատվա-վերլուծաբանական պոտենցիալը ԱՊՀ տարածքում և ընդհանրապես աշխարհում իրավիճակի խոր ու համակողմանի ուսումնասիրման, գերակայությունների հստակ սահմանման, ռազմավարական պլանավորման փաստաթղթերի ճշգրտումը ժամանակին կատարելու համար»,- նշել է նա։

ՌԴ նախագահը վստահ է, որ Անվտանգության խորհուրդների միջոցով համագործակցությունը կշարունակի ծառայել ԱՊՀ երկրների կայունության և անվտանգության ամրապնդմանը և ընդհանուր նպատակներին հասնելու համակարգված մոտեցումների մշակմանը։