G7-ը մտահոգություն է հայտնել ԼՂ հայերի բռնի վերաբնակեցման կապակցությամբ

Յոթնյակի (G7) երկրները մտահոգված են Ադրբեջանի ռազմական գործողություններից հետո Լեռնային Ղարաբաղից հայերի հարկադիր վերաբնակեցմամբ։ Այս մասին ասված է G7-ի արտաքին կապերի գերատեսչությունների ղեկավարների համատեղ հայտարարության մեջ՝ Տոկիոյում երկօրյա հանդիպման արդյունքներով։

«Մենք մեծապես անհանգստացած ենք Ադրբեջանի կողմից իրականացված ռազմական գործողությունից հետո Լեռնային Ղարաբաղից հայերի վերաբնակեցման մարդասիրական հետեւանքներով։ Մենք կոչ ենք անում Ադրբեջանին լիովին կատարել միջազգային մարդասիրական իրավունքով ստանձնած պարտավորությունները և ողջունել միջազգային ջանքերը՝ իրենց տները լքելու հարկադրված մարդկանց հրատապ հումանիտար կարիքները բավարարելու համար»,- ասվում է հաղորդագրության մեջ:

Հայտարարության մեջ նշվում է, որ G7-ն աջակցում է «Հայաստանի և Ադրբեջանի միջև կայուն խաղաղություն հաստատելուն ուղղված քայլերին՝ հիմնված ուժի չկիրառման, ինքնիշխանության հարգման, սահմանների անձեռնմխելիության և տարածքային ամբողջականության սկզբունքների վրա»։