«Դա լինելու է հենց հայերի ընտրությունը». ադրբեջանցի պաշտոնյա
Զանգեզուրի միջանցքը ռազմավարական ծրագիր է, որը հզոր խթան կհաղորդի համաշխարհային առևտրին։ Ինչպես հաղորդում է Trend-ը, այս մասին «In Terris» վերլուծական և տեղեկատվական պորտալին տված հարցազրույցում ասել է Ադրբեջանի նախագահի հատուկ հանձնարարությունների գծով ներկայացուցիչ, դեսպան Էլչին Ամիրբեկովը։
«Իրականում սա ոչ միայն Ադրբեջանին և Հայաստանին կամ տարածաշրջանի պետություններին կապող օղակ է, այլ միևնույն ժամանակ, ավելի լայն իմաստով, այն կարող է այլընտրանքային ճանապարհ դառնալ Միջին միջանցքի համար, որը կմիացնի Ասիան Եվրոպայի հետ։Ըստ էության, սա ռազմավարական նախագիծ է, որը հզոր զարկ կտա համաշխարհային առևտրին։
Եթե Հայաստանին դուր չի գալիս «միջանցք» բառը, ապա կարող են օգտագործվել «անցում», «ճանապարհ», «միացում» և այլ տերմիններ։ Միջանցքը զուտ տնտեսական և տրանսպորտային հայեցակարգ է։ Եթե Հայաստանն այս հարցում չկատարի իր պարտավորությունները, մենք, ըստ էության, ունենք այլընտրանքային տարբերակ։
Այսպիսով, մոտ ապագայում կիրականացվի նախագիծ, որը Իրանի տարածքով անցնող երկաթուղով և ավտոմայրուղով կկապի Ադրբեջանի հիմնական մասը Նախիջևանի Ինքնավար Հանրապետության հետ։ Ինչ վերաբերում է Հայաստանին, ապա այն տարածաշրջանում կմնա փակուղում, և դա լինելու է հենց հայերի ընտրությունը»,- ասել է նա։
