Որքան կտևեն Գազայում ինտենսիվ ռազմական գործողությունները․ Jerusalem Post

Իսրայելի պաշտպանության բանակը (ՑԱԽԱԼ) պատրաստվում է ձմռանը շարունակել ՀԱՄԱՍ-ի դեմ ռազմական գործողությունները և սկսել է զինվորներին հատուկ հանդերձանքով մատակարարելու լայնածավալ աշխատանքը, հայտնում է Jerusalem Post թերթը: Տեղեկությունը փոխանցում է ՌԻԱ Նովոստին։

Զինվորականների հայտարարության համաձայն՝ բանակում արդեն բաշխվել է 129 հազար ձմեռային բաճկոն և 369 հազար մեկանգամյա օգտագործման տաքացուցիչ։

Թերթի փոխանցմամբ՝ նույնիսկ համազգեստի եւ հանդերձանքի հարցը լուծելիս պարզ չէ, թե ՑԱԽԱԼ-ը որքանով պատրաստ կլինի ռազմավարական և մարտավարական առումով՝ հաշվի առնելով ձմռանը մարտական գործողությունների փորձի բացակայությունը: Այս խնդիրը բազմապատկվում է, եթե հաշվի առնենք, որ Գազայի հատվածում ցամաքային գործողության ավարտի իրական ամսաթիվը որոշված չէ։

Ավելի վաղ ՑԱԽԱԼ-ի հրամանատարությունն ու քաղաքական գործիչները որոշել էին, որ հակամարտության «թեժ» հատվածի տեւողությունը լինելու է մեկ-երկու ամիս, ինչը կնշանակեր ռազմական գործողությունների դադարեցում դեկտեմբերի 7-ին: Սակայն ցամաքային գործողությունը սկսվել է միայն հոկտեմբերի վերջին, ինչը կարող է ծանր մարտերը տեղափոխել դեկտեմբերի վերջ։

«Իսկ վերջին հայտարարությունները հուշում են, որ ինտենսիվ ռազմական գործողությունների շրջանը կարող է տևել ևս մի քանի ամիս»,- գրում է թերթը։