Իրականում իրավիճակը սրվել է Իսրայելի ղեկավարության գործողությունների պատճառով․ Իրաքի վարչապետ
Մերձավոր Արևելքում հակամարտության սրումը պաղեստինցի ժողովրդի նկատմամբ Իսրայելի քաղաքականության արդյունքն է։ Այս մասին ասել է Իրաքի վարչապետ Մուհամեդ Աս–Սուդանին, որի հայտարարությունը հրապարակվել է նրա գրասենյակի Telegram ալիքում: Տեղեկությունը փոխանցում է gazeta.ru-ն։
Կառավարության ղեկավարն այսօր աշխատանքային այցով եղել է Իրանում: Նա բանակցություններ է վարել Իսլամական Հանրապետության նախագահ Իբրահիմ Ռաիսիի հետ, որից հետո տեղի է ունեցել նրանց համատեղ մամուլի ասուլիսը:
Միջոցառման ընթացքում Մուհամեդ Աս–Սուդանին նշել է, որ մերձավորարեւելյան հակամարտության սրումը պայմանավորված չի հոկտեմբերի 7-ին Իսրայելի վրա պաղեստինյան ՀԱՄԱՍ շարժման հարձակմամբ: Նրա խոսքով՝ իրականում իրավիճակը սրվել է Իսրայելի ղեկավարության գործողությունների պատճառով։
«Վերջին ճգնաժամը պաղեստինցիների դեմ իսրայելական իշխանությունների օկուպացիոն հանցավոր քաղաքականության, բռնի տեղահանումների, բնակավայրերի կառուցման, Ալ-Աքսա մզկիթում պաղեստինցիների իրավունքների խախտումների արդյունքն է»,-ընդգծել Է Իրաքի վարչապետը:
