Վերջնագի՞ր․ Ադրբեջանը Հայաստանից պահանջում է 8 գյուղ

Ադրբեջանի ԱԳՆ-ն հայտարարություն է տարածել, որտեղ Հայաստանին կոչ է արել ճիշտ հասկանալ տարածաշրջանի իրողությունները։

«տարածաշրջանում խաղաղության և կայունության լայն հնարավորություններ են ստեղծվել։ Ադրբեջանը, հավատարիմ մնալով հարաբերությունների կարգավորման գործընթացին, ինչպես նաև Ղարաբաղում ապրող հայերի վերաինտեգրմանը, կոչ է անում Հայաստանին կառուցողական և արդար դիրքորոշում որդեգրել խաղաղության գործընթացում և ճիշտ ընկալել նոր իրողությունները»,- ասված է հաղորդագրության մեջ։

Պաշտոնական Բաքուն կրկին մեղադրել է Հայաստանին և հնչեցրել իր պահանջները։ 

«Հայաստանն ընտրել է խաղաղության համաձայնագրի շուրջ բանակցությունները խոչընդոտելու ճանապարհը՝ շարունակելով ռազմաքաղաքական սադրանքներն ու ականապատումը՝ դրանով իսկ վտանգելով խաղաղ գործընթացը, մեր քաղաքացիների կյանքը, խոչընդոտելով տարածաշրջանում վերականգնման և վերակառուցման աշխատանքները: Ընդ որում, հայկական կողմը, ի հեճուկս իր ստանձնած պարտավորությունների, ոչ միայն Ադրբեջանի տարածքից դուրս չի բերել իր զինված ուժերը, որոնք տարածաշրջանում խաղաղության և անվտանգության հիմնական սպառնալիքն են, այլև շարունակել է նրանց նյութական և ֆինանսական աջակցությունը, չի դադարեցրել զենքի, ռազմական տեխնիկայի և ականների ապօրինի տեղափոխումը Ադրբեջանի տարածք: Հայաստանը Ադրբեջանին չի փոխանցել նաև ադրբեջանական 8 գյուղեր, որոնք մինչ օրս օկուպացիայի տակ են»,- ընդգծվում է հայտարարության մեջ։

Auroranews-ը փորձում է կապ հաստատել ՀՀ ԱԳՆ, սակայն մինչ այս պահը արտգործնախարարությունից արձագանք չի եղել։