Հուսով ենք, որ այդ հատուկ հնարավորությունը բաց չի թողնվի․ Բայրամով

Ադրբեջանի ԱԳ նախարարը  Ռումինիայի ԱԳ նախարարի հետ համատեղ ասուլիսի ընթացքում Հայաստանին կոչ է արել բաց չթողնել խաղաղության պայմանագրի ստորագրման հնարավորությունը։

Ադրբեջանի ԱԳՆ ղեկավար Ջեյհուն Բայրամովը կարծում է՝ Ադրբեջանի ինքնիշխանության վերականգնումը նոր հնարավորություններ է բացում Հայաստանի հետ խաղաղության համար։ 

Նրա խոսքով ՝ ներկայումս պայմանավորվածություններ կնքելու հատուկ հնարավորություն կա։

«Այս կարգավորումը, ինքնիշխանության, տարածքային ամբողջականության և միմյանց սահմանների անձեռնմխելիության փոխադարձ ճանաչման և հարգանքի հիման վրա, ոչ միայն կծառայի Ադրբեջանին և Հայաստանին, այլև կապահովի տարածաշրջանում և նրա սահմաններից դուրս համագործակցության չօգտագործված հնարավորությունների բացումը։ Օգտվելով առիթից՝ ևս մեկ անգամ ցանկանում եմ ընդգծել Ադրբեջանի խաղաղ օրակարգը։ Մենք հակառակ կողմից ակնկալում ենք կառուցողական մոտեցում և փոխադարձ քայլեր։ Հուսով ենք, որ այդ հատուկ հնարավորությունը բաց չի թողնվի»,- ասել է Բայրամովը Բուխարեստում իր ռումինացի գործընկերոջ հետ հանդիպումից հետո:

Ռումինիայի արտաքին գործերի նախարարն էլ իր հերթին նշել է, որ Ռումինիան աջակցում է Ադրբեջանի և Հայաստանի միջև խաղաղ կարգավորման գործընթացին: 

«Ռումինիան աջակցում է Եվրոպական խորհրդի նախագահ Շառլ Միշելի միջնորդական ջանքերին: Մենք հանդես ենք գալիս այս հարցի լուծման օգտին՝ միջազգային իրավունքի սկզբունքների հարգմամբ: Հարավային Կովկասում կայուն խաղաղության և անվտանգության հաստատումը մեծ նշանակություն ունի Ռումինիայի համար»,- նշել է Ռումինիայի արտաքին գործերի նախարար Լումինիցա Օդոբեսկուն։