Հայաստանի բուժհաստատություններից մեկում մարդիկ հաճախ մինչև 6 ամիս աշխատավարձ չեն ստանում

Հայաստանի մի քանի հիվանդանոցում բուժաշխատողների աշխատավարձերը սահմանված ժամկետներում չեն տրամադրվում։ Այս մասին ԱԺ-ում ասաց ՔՊ–ական պատգամավոր Հրաչյա Հակոբյանը և ընդգծեց, որ հաճախ են դիմում նման հարցով և նույնիսկ լինում են դեպքեր, երբ մի քանի ամսով չեն վճարվում։ 

Պատասխանելով պատգամավորի այն հարցին, թե ինչով է պայմանավորված, որ բուժկենտրոններում աշխատակիցների աշխատավարձերը երբեմն ուշացնում են, ՀՀ առողջապահության նախարար Անահիտ Ավանեսյանն ասաց, որ բոլորը պարտավորեն են ճիշտ ժամկետում վճարել աշխատավարձերը։

«Կարծում եմ` պետք չէ առանձնացնել բուժհաստատությունները։ Ցանկացած կազմակերպություն պետք է իր անձնակազմի աշխատավարձը ճիշտ ժամկետներում ամբողջովին վճարի։ Աշխատակիցներն էլ պետք է իրենց աշխատանքային իրավունքները պաշտպանեն։ Եթե կոնկրետ դեպք գիտեք, խնդրում եմ նշեք, հասկանանք՝ ինչն է խնդիրը»,– նշեց Ավանեսյանը։ 

Առողջապահության նախարարն ընդգծեց` ԲԿ-ներն իրենց ծախսերն ու եկամուտներն այնպես պետք է պլանավորեն ու նախահաշիվները կազմեն, որ աշխատավարձի որևէ ուշացում չլինի։

Սրան ի պատասխան պատգամավորը խնդրեց ուսումնասիրություն անցկացնել Ապարանի բժշկական կենտրոնում՝ պարզելու, թե որն է պատճառը, որ բոլոր աշխատակիցների աշխատավարձերն ուշացնում են, և մարդիկ 3, 4 և հաճախ մինչև 6 ամիս աշխատավարձ չեն ստանում։