Հորդանանը Իսրայելից հետ է կանչել իր դեսպանին
Հորդանանի փոխվարչապետ և արտաքին գործերի նախարար Այման աս-Սաֆադին որոշել է անհապաղ Իսրայելից հետ կանչել իր երկրի դեսպանին ՝ Գազայի հատվածում ստեղծված իրավիճակի պատճառով, ասվում է երկրի ԱԳՆ-ի հաղորդագրության մեջ։
Ալ-Սաֆադին նաև կարգադրել է Իսրայելի ԱԳՆ-ին տեղեկացնել, որ վերջինս կարող է չվերադարձնել ավելի վաղ Հորդանանից հեռացած իր դեսպանին:
«Այս որոշումը Գազայի հատվածում իսրայելական կատաղի պատերազմը մերժելու Հորդանանի վճռական արտահայտությունն է: Այն հանգեցրել է անմեղ քաղաքացիների սպանություններին և աննախադեպ լուրջ հումանիտար ճգնաժամի», - ասվում է Հորդանանի ԱԳՆ հայտարարության մեջ:
Հորդանանն ընդգծել է, որ դեսպանները կկարողանան վերադառնալ այն բանից հետո, երբ Իսրայելը դադարեցնի ռազմական գործողությունները Գազայի հատվածում։ Ալ-Սաֆադին նշել է, որ Հորդանանը կշարունակի աշխատել Գազայում պատերազմին վերջ տալու ուղղությամբ։ Նա խոսել է 1967 թվականի պայմանագրի հիման վրա տարածաշրջանում խաղաղության հասնելու անհրաժեշտության մասին, ըստ որի՝ Պաղեստինի մայրաքաղաքը գտնվում է Երուսաղեմում։
Ավելի վաղ Բոլիվիայի իշխանությունները հայտարարել էին Իսրայելի հետ դիվանագիտական հարաբերությունները խզելու մասին՝ Գազայի հատվածում Իսրայելի պաշտպանության բանակի գործողության պատճառով։ Չիլին և Կոլումբիան հայտարարել են Իսրայելից իրենց դեսպաններին խորհրդակցությունների համար հետ կանչելու մասին։ Երեք երկրներն էլ հրադադարի կոչ են արել։ Իսրայելի ԱԳՆ-ն Բոլիվիայի որոշումը անվանել է «կապիտուլյացիա ահաբեկչության և Իրանի ռեժիմի առաջ»։
Հոկտեմբերի 7-ին ՀԱՄԱՍ-ի զինյալները հարձակվեցին Իսրայելի վրա՝ հազարավոր հրթիռներ արձակելով, սպանելով 1400 մարդու և ավելի քան 200 պատանդ վերցնելով։ Ի պատասխան՝ Իսրայելի պաշտպանության ուժերը սկսեցին ավիահարվածներ հասցնել Գազայի հատվածին, իսկ հոկտեմբերի վերջին իսրայելական զորքերը մտան Գազայի հատված։ Պաղեստինյան կողմի տվյալներով՝ հոկտեմբերի սկզբից Գազայի հատվածում սպանվել է մոտ 8,5 հազար մարդ, այդ թվում՝ 3,5 հազար երեխա։
