Առավելություն չեմ տեսնում ռուսական ռազմաբազաների շարունակական ներկայության մեջ. Նիկոլ Փաշինյան. WSJ
Վարչապետ Նիկոլ Փաշինյանը ամերիկյան Wall Street Journal-ին տված հարցազրույցում նշել է, որ առավելություն չի տեսնում ռուսական ռազմաբազաների շարունակական ներկայության մեջ:
Ըստ հարցազրույցից հրապարակված հատվածների՝ նա հայտնել է, որ Երևանը նոր գործընկերներ է փնտրում, քանի որ Ռուսաստանը «չի կատարել իր դաշնակցային պարտավորությունները»։
Փաշինյանի խոսքով՝ Արցախում տեղի ունեցած վերջին իրադարձությունները Հայաստանին հանգեցրին անվտանգության ոլորտում հարաբերությունները դիվերսիֆիկացնելու անհրաժեշտության որոշմանը:
Հիշեցնենք, որ վարչապետ Նիկոլ Փաշինյանն օրերս հարցազրույց է տվել The Wall Street Journal-ին, որի հոդվածը կհրապարկվի առաջիկայում:
Հարցազրույցի տեսանյութն ամբողջությամբ կհեռարձակվի վարչապետի ֆեյսբուքյան էջով և կառավարության յութուբյան պաշտոնական ալիքով՝ այսօր երեկոյան 22:10-ին:
Հարցազրույցի ընթացքում վարչապետն անդրադարձել է «Խաղաղության խաչմերուկ» նախագծին, Ադրբեջանի կողմից Լեռնային Ղարաբաղում էթնիկ զտման քաղաքականության հետևանքով 100 հազարից ավելի մեր հայրենակիցների բռնի տեղահանությանը, տարածաշրջանում տեղի ունեցող գործընթացներին և այլ հարցերի։
