Մենք պատրաստ ենք դրան ռազմական տեսանկյունից․ ՌԴ-ում Իսրայելի դեսպան

Իսրայելը պատրաստ է ընդլայնել հակամարտությունը պաղեստինա-իսրայելական հարաբերությունների սրման ֆոնին, բայց երկիրը ոչ մի հետաքրքրություն չունի նման սցենարի նկատմամբ, հայտարարել է ՌԴ-ում Իսրայելի դեսպան Ալեքսանդր Բեն Ցվին: Փոխանցում է ՌԻԱ Նովոստին։ 

«Մենք չենք մեր նախաձեռնությամբ ռմբակոծում Լիբանանն ու Սիրիան։ «Հեզբոլլահ»-ը, Սիրիայում շիա խմբավորումները և այլն սկսում են գնդակոծել մեր տարածքը, կարծես ՀԱՄԱՍ-ին օգնելու համար։ Մենք պատրաստ ենք դրան, այսինքն՝ մենք պատրաստ ենք ռազմական տեսանկյունից, բայց մենք ոչ մի հետաքրքրություն չունենք այդ հակամարտությունն ընդլայնելու հարցում»,- ասել է դեսպանը Ռոսիա 24 հեռուստաալիքի եթերում։

Իսրայելի դեսպանը հավելել է, որ միակ նման հետաքրքրություն ունեցողն Իրանն է, որն այս բոլոր խմբավորումները ֆինանսավորում, վերապատրաստում և զինում է: Ընդ որում, դեսպանի խոսքով, Իսրայելը ոչ մի հետաքրքրություն չունի ոչ Լիբանանի, ոչ Սիրիայի տարածքի նկատմամբ: 

Ռուսաստանում Իսրայելի դեսպանը հայտնել Է նաև ՀԱՄԱՍ-ի հետ ուղիղ բանակցությունների բացակայության մասին։ 

«Իսրայելի և ՀԱՄԱՍ-ի միջև ուղիղ բանակցություններ չկան։ Եվ չի կարող լինել, քանի որ մեր դիրքորոշումը շատ պարզ է՝ բոլոր պատանդները պետք է ազատ արձակվեն առանց ինչ-որ պայմանների։ Մենք, ցավոք, տեղեկություն չունենք, թե ինչ է կատարվում նրանց հետ։ Մենք նույնիսկ չգիտենք, թե նրանցից ով է ողջ»,- նշել է Ալեքսանդր Բեն Ցվին եթերում: