Հունգարիան կրկին արգելափակել է Ուկրաինային 500 միլիոն եվրոյի ռազմական օգնության հատկացումը

Եվրամիության արտգործնախարարները չեն կարողացել համաձայնության գալ Խաղաղության եվրոպական հիմնադրամից Ուկրաինային 500 միլիոն եվրոյի չափով ռազմական օգնության հատկացման շուրջ։ Այս մասին մամուլի ասուլիսի ժամանակ հայտարարել է ԵՄ արտաքին քաղաքականության պատասխանատու Ժոզեպ Բորելը։ 

«Հունգարիայի դիրքորոշման պատճառով համաձայնություն ձեռք չի բերվել»,– հայտնում է «Ազատություն» ռադիոկայանի Բրյուսելի թղթակից Ռիկարդ Յոզվիակը,–«Ինչպես և սպասվում էր, ԵՄ ԱԳ նախարարների այսօրվա հանդիպմանը համաձայնություն ձեռք չի բերվել Ուկրաինային ԵՄ ռազմական օգնության ութերորդ տրանշի (500 միլիոն) վերաբերյալ»:

Խաղաղության եվրոպական հիմնադրամը ստեղծվել է 2021 թվականի մարտին։ Այն ֆինանսավորվում է ԵՄ անդամ երկրների ներդրումներից։ Հիմնադրամի շրջանակներում Ուկրաինան ԵՄ-ից ստացել է մոտ 3,6 մլրդ եվրո։ Բացի Ուկրաինայից, Խաղաղության եվրոպական հիմնադրամը ֆինանսավորել է պաշտպանական օգնությունը մի շարք այլ երկրների, այդ թվում՝ Վրաստանին, Մոլդովային, Մալիին, Սոմալիին և Լիբանանին։