Քանի դեռ ԱՄՆ-ն գոյություն ունի, Իսրայելը երբեք ստիպված չի լինի միայնակ պաշտպանել իրեն. Բլինկեն

ԱՄՆ պետքարտուղար Էնթոնի Բլինկենը Թել Ավիվում խոստացել է, որ քանի դեռ ԱՄՆ-ն գոյություն ունի, Իսրայելը երբեք ստիպված չի լինի միայնակ պաշտպանել իրեն: Այս մասին հայտնում է timesofisrael.com-ը:

Բլինկենն ընդգծել է, որ եռանդուն աշխատում է, որպեսզի Իսրայելի և պաղեստինյան ՀԱՄԱՍ խմբավորման միջև շարունակվող հակամարտությունը չընդարձակվի: Այս համատեքստում նա նշել է, որ Իսրայելում ՀԱՄԱՍ-ի հարձակումների հետևանքով ԱՄՆ 25 քաղաքացի է զոհվել:

«Իսրայել եմ եկել հետևյալ ուղերձով՝ դուք կարող եք բավականաչափ ուժեղ լինել ինքներդ ձեզ պաշտպանելու համար, բայց քանի դեռ Ամերիկան կա, դուք երբեք ստիպված չեք լինի դա անել. մենք միշտ կլինենք ձեր կողքին: Դա այն ուղերձն է, որը նախագահ Բայդենը փոխանցեց վարչապետին այս ճգնաժամի սկսվելու պահից», - հավելել է նա:

Բլինկենը կրկնել է ԱՄՆ-ի հստակ նախազգուշացումը ցանկացած այլ դերակատարի դեմ՝ պետական կամ ոչ պետական, որը կփորձի ճգնաժամից օգտվել Իսրայելի վրա հարձակվելու համար. «Չանե՛ք. ԱՄՆ-ն Իսրայելի թիկունքին է»:

«ԱՄՆ-ն աշխարհի ամենամեծ ավիակիրը տեղակայել է Միջերկրական ծովի արևելյան հատվածում, ուժեղացրել է ամերիկյան կործանիչների ներկայությունը տարածաշրջանում և Իսրայելին այլ բնույթի աջակցություն ցուցաբերել», - եզրափակել է պետքարտուղարը: