Հյուրանոցներն ինչքա՞ն են իրենց հարկի տակ պահելու բռնի տեղահանվածներին. Սյունիքի մարզպետի աշխատակազմից պատասխանում են

Տասնյակ հազարավոր մարդիկ հաշվառվել են այս պահի դրությամբ: Auroranews-ը կապ հաստատեց Սյունիքի մարզպետի աշխատակազմի գլխավոր քարտուղար Էդգար Մարտիրոսյանի հետ՝ հասկանալու` ինչ իրավիճակ է այնտեղ, բռնի տեղահանված մեր հայրենակիցներն ի՞նչ խնդիրների կարող են բախվել: 

Խոսելով Գորիսի հյուրանոցներում ազատ տեղերի առկայության մասին` Մարտիրոսյանը նշեց, որ վաղուց տեղեր չկան: «Բռնի տեղահանված մեր հայրենակիցների մի մասը գալիս է Գորիս, հաշվառվում են, ապահովվում են սնունդով, երեխաների համար` մանկական կեր, եթե դրա անհրաժեշտությունը կա, եթե անհրաժեշտ է, բժշկական օգնություն, և տեղավորում ենք բնակվելու ՀՀ ողջ տարածքում»: 

Ճշտող հարցին` այսինքն, չեք կենտրոնացել միայն Սյունիքի վրա՝ դիտարկվում է ՀՀ ողջ տարածքը, Մարտիրոսյանը պատասխանեց. «Մենք ուղարկել ենք և Վայոց ձոր, և Լոռի, Շիրակ, Արագածոտն Տավուշ, Կոտայք»: 

Հարցին՝ հյուրանոցները ինչքա՞ն ժամանակ են պատրաստ իրենց հարկի տակ պահել բռնի տեղահանված մեր հայենակիցներին, Մարտիրոսյանն ասաց. «Ինչքան որ պետք է»: 

Հիշեցնենք` ժամը 15։00-ի դրությամբ բռնի տեղահանվել և ՀՀ սահմանը հատել է 50 243 անձ։