Երևանում ՌԴ դեսպանատունը նոտա է հղել ՀՀ ԱԳՆ–ին

ՌԴ դեսպանատունը նոտա է հղել ՀՀ ԱԳՆ-ին դեսպանատան շենքը շրջափակած ցուցարարների առնչությամբ: Այս մասին հայտնել է Հայաստանում ՌԴ դեսպանության մամուլի քարտուղար Ալեքսանդր Գուչկովը։

Նշվում է, որ Հայաստանում Ռուսաստանի դեսպանատան շենքի մոտ բողոքի ակցիա իրականացնելու վերաբերյալ համացանցում տարածված կոչերից հետո դիվանագիտական առաքելությունն արգելափակվել է շենքում։ Սկզբում արգելափակումը մասնակի էր, իսկ հիմա արդեն` ամբողջությամբ։ Դեսպանության բնականոն գործունեությունը ներկա դրությամբ անհնար է:

«Կապի մեջ ենք Հայաստանի Հանրապետության իրավասու մարմինների հետ: Նոտա ենք հղել ՀՀ ԱԳՆ՝ դիվանագիտական հարաբերությունների մասին Վիեննայի կոնվենցիայով ստանձնած պարտավորություններին համապատասխան դեսպանության բնականոն գործունեությունը վերականգնելու համար միջոցներ ձեռնարկելու նպատակով»,– ասել է Գուչկովը։

Նշենք, որ դեսպանատան մոտ բողոքի ակցիան շարունակվում է։