ՏԵՍԱՆՅՈՒԹ. Ալեն Սիմոնյանը՝ երթին մեծ թվով ոստիկանների և մարզերից քաղաքացիների ներգրավելու մասին
ՔՊ-ի կազմակերպած երթից առաջ ԱԺ նախագահ Ալեն Սիմոնյանից լրագրողները հետաքրքրվել են, թե ինչով է պայմանավորված մեծ թվով ոստիկանների կենտրոնացումը, իշխանության վախերո՞վ:
Հարցին ի պատասխան՝ Ալեն Սիմոնյանը չի բացառել «սադրանքները»։
«Գիտեք ինչ, սադրանքներ, արտաքին թշնամու կողմից, արտաքին հակառակորդի կողմից որևիցե քայլ երբևիցե չենք բացառում։ Մենք էնպիսի բաներ ենք տեսել մեր պատմության մեջ, որ ո՞նց կարելի է բացառել, առավել ևս, որ ողջ իշխանությունը մի տեղում է գտնվում, բնական է, շատ կարևոր է, որ անվտանգությունն ապահովված լինի»,- պատասխանել է Սիմոնյանը։
Լրագրողները խնդրել են հստակեցնել՝ կոնկրետ ի՞նչ թշնամու նկատի ունի Սիմոնյանը։
«Հետաքրքիր հարցեր եք տալիս։ Ներսում էլ կարող է թշնամի լինել, որը, հնարավոր է, ինչ-որ բան փորձի անել»,- ասել է նա։
ԱԺ նախագահին հարց են տվել նաև երթին և հանրահավաքին մարզերից մեծ թվով քաղաքացիների հոսքի մասին, ինչին ի պատասխան՝ Ալեն Սիմոնյանը հորդորել է շրջել և հարցնել ներկաներին:
